Lajme Kosovë

Takimi i 2 majit në Bruksel, lirimi nga detyra i Ekipit menaxhues për Asociacionin dhe largimi i Abazit nga LVV-ja – top lajmet e javës

Java që po lëmë pas nisi me takimet në Bruksel ndërmjet Kosovës dhe Serbisë në kuadër të dialogut për normalizimin e marrëdhënieve.

Në takimin e 2 majit, kryeministri Albin Kurti dhe presidenti i Serbisë, Aleksandar Vuçiq u dakorduan për çështjen e të pagjeturve, gjersa lidhur me këtë Bashkimi Evropian më pas publikoi Deklaratën për të pagjetur. Po palët nuk ranë dakord edhe për çështjen e Asociacionit të komunave me shumicë serbe.

Një ditë pas takimit në Bruksel, Qeveria e Kosovës liroi nga detyra Ekipin menaxhues për hartimin e draft-statusit të Asociacionit.

Ndërkaq, zhvillime ka pasur edhe në Lëvizjen Vetëvendosje, ku kjo parti ka larguar nga radhët e saj deputetin Haki Abazi.

Deklarata për të Zhdukurit, të cilën e miratuan Kurti dhe Vuçiq

Bashkimi Evropian ka publikuar Deklaratën për të Zhdukurit për të cilën u pajtuan kryeministri i Kosovës, Albin Kurti dhe presidenti serb Aleksandër Vuçiq.

Aty deklarohet angazhimi i palëve për zbardhjen e personave të pagjetur nga periudha 1 janar 1998 deri më 31 dhjetor 2000.

Në këtë deklaratë është e cekur se përfshihen edhe personat e zhdukur me forcë, një term ky për të cilin pala kosovare ka insistuar që të përfshihet me patjetër në deklaratë.

Me këtë deklaratë, të dy vendet janë pajtuar për të siguruar qasjen e plotë në informacione të besueshme dhe të sakta që ndihmojnë të gjenden dhe identifikohen personat e zhdukur, kjo përfshin të gjitha materialet, shënimet, urdhrat, dokumentet, videot, audio-incizimet, dhe çdo dokument tjetër përfshirë edhe ato që kanë statusin e klasifikuar, nën posedimin e institucioneve të dyja palëve, që janë të rëndësishme për këtë kontekst.

Nga ana e Serbisë veçanërisht ka pasur mungesë bashkëpunimi, sipas autoriteteve të Kosovës, duke mos ofruar të dhëna rreth varrezave masive që ekzistojnë në Serbi.

Aktualisht në Kosovë janë 1643 persona fati i të cilëve ende nuk dihet.

Lirohet nga detyra Ekipi Menaxhues për hartimin e draft-statutit të Asociacionit

Ministri i Administrimit të Pushtetit Lokal, Elbert Krasniqi një ditë pas takimit që ishte në Bruksel ndërmjet Kurtit dhe Vuçiqit, mori vendim për lirimin nga detyra të Ekipit menaxhues për hartimin e draft-statutit të Asociacionit të komunave me shumicë serbe.

Krasniqi këtë e kishte bërë të ditur në një postim në Facebook.

“Pas prezantimit në Bruksel të draft statutit të Asociacionit të Komunave me Shumicë Serbe, sipas përgjegjësive që i ishin dhënë Ekipit Menaxhues në marrëveshjet e Brukselit të vitit 2013 dhe 2015, ky ekip tash edhe vet është pa status.

Andaj, më datë 03 maj 2023, kam marr vendim për lirimin nga detyra të anëtarëve të këtij ekipi menaxhues, në përbërje të Danijela Vujiçiq, Jelena Bolovic, Igor Kalamar dhe Dejan Radojkoviq”, thuhet në njoftim.

Kjo ka ngjallë reagimin e Bashkimit Evropian. Peter Stano, zëdhënës i BE-së theksoi se lirimi nga detyra i Ekipit Menaxhues për statutin e Asociacionit është në kundërshtim me marrëveshjen për dialogun.

E pas kësaj deklarate të menjëhershme kanë qenë reagimet nga Presidenca e Qeveria.

LVV-ja e përjashton Haki Abazin nga Grupi Parlamentar, deklarohet deputeti

Lëvizja Vetëvendosje gjatë javës që po e lëmë e ka përjashtuar nga Grupi Parlamentar deputetin Haki Abazi.

Lajmin e kishte konfirmuar për Telegrafin kryetarja e grupit, Mimoza Kusari-Lila, e cila ka thënë se vendimi për përjashtimin e tij është marrë unanimisht dhe si rrjedhojë, atij i ndërrohet edhe ulësja në Kuvendin e Kosovës.

Pas përjashtimit nga Grupi Parlamentar i LVV-së, Haki Abazi ndërron ulësen në Kuvend

Ajo gjithashtu ka deklaruar se për vendimin është njoftuar Abazi, megjithatë ky i fundit e ka mohuar një gjë të tillë.

Në një prononcim për Telegrafin, Abazi më pas theksoi se vendime të tilla janë arbitrare dhe se nuk mund të komentojë më shumë.

“Këto janë vendime arbitrare. Nuk e kam pranuar vendimin, por jam njoftuar nga mediat. Ende nuk e kam parë vendimin dhe prandaj s’mund të komentojë më shumë”, është shprehur Abazi.

Abazi, ka pretenduar se kjo erdhi pak ditë pasi presidenti serb, Aleksandër Vuçiq ia përmendi emrin në Kuvendin e Serbisë.

“]

“Një javë pasi Vuçiq më përmendi 2 herë emrin në parlamentin serb, erdhi vendimi arbitrar, i pavendosur në asnjë instancë partiake”, ishte shprehur ai.

Abazi tutje ka deklaruar se kryeministri Kurti ka paranojë ndaj të tjerëve që mund të ke mendim ndryshe apo kritik në LVV.

“Kjo do të jetë emërues i përbashkët i asaj që ka ndodhë në vazhdimësi…kryeministri Kurti duket që ka paranojë të skajshme ndaj kujtdo që mund të ketë mendim të qartë e ndryshe apo mendim kritik brenda Lëvizjes Vetëvendosje. Kjo është testuar në përcaktimin e kandidatëve për kryetar komunash, zgjedhjet e brendshme etj” , u shpreh deputeti Abazi. /Telegrafi/