Superliga vazhdon me ndeshjet e xhiros së tetë, në Lipjan zhvillohet derbi i Anamoravës

Superliga e Kosovës vazhdon me ndeshjet e xhiros së tetë, ku në program janë dy për tu zhvilluar.

Padyshim që vëmendja e adhuruesve të futbollit kosovar do të jetë në Lipjan, ku Drita dhe Gjilani do ta zhvillojnë derbin e parë lokal të këtij edicioni në elitën e futbollit kosovar.

Sa herë këto dy skuadra përballen nuk mungon rivaliteti në fushë si dhe spektakli në tribuna, por fatkeqësisht edhe ky derbi do të zhvillohet me vetëm njërën tifozëri, kësaj radhe vendase.

Drita ka dhënë arsyen se për shkak të situatës në vendin tonë dhe për arsyeje se stadiumi nuk i plotëson kushtet është vendosur që kjo ndeshje të zhvillohet në Lipjan dhe vetëm me njërën tifozëri.

Kjo sfidë do të zhvillohet me fillim nga ora 15:00 me Dritën që po kërkon fitoren e tretë radhazi, derisa Gjilani synon që mos të mposhtet në derbin lokal.

Derbin lokal mes Dritës dhe Gjilanit do ta gjykojë Erdal Zasella me ndihmësit Fatmir Sekiraqa e Altin Zhegrova, derisa në VAR janë dyshja Mentor Ajeti dhe Enis Bejtullahu.

Dueli tjetër i ditës së sotme do të zhvillohet në stadiumin ’18 qershori’ në Klinë ku Dukagjini pret Feronikelin ’74.

Klinasit nuk dinë për humbje në pesë ndeshjet e fundit duke marrë një fitore e katër barazime dhe synojnë që të vazhdojnë serinë pozitive.

Në anën tjerë 74-shi pas disfatës nga Drita në mesjavë kërkojnë të rikthehen te rezultatet pozitive. /Telegrafi/