Sulmohet vajza me shami në qendër të Shkupit (Video)

Studentja muslimane me mbulesë nga qyteti i Shkupit, Sumeja Ademi (19), bashkë me shoqen e saj të krishtere, të enjten e kaluar janë sulmuar fizikisht dhe verbalisht në qendrën e qytetit të Shkupit nga tre maqedonas të fesë krishtere, duke i porositur se “ky është vend i krishterëve, ndërsa ata me mbulesë të zhduken nga kanë ardhur në Arabinë Saudite”, raporton Anadolu Agency (AA).

Sumeja e cila bashkë me shoqen e saj të universitetit u sulmuan nga një grup prej tre personash, dy meshkuj dhe një femër, për AA shpejgon se u sulmuan në qendër të qytetit duke ndenjur ulur në ulëset e sheshit. Në kohën kur kaloi grupi pranë tyre, siç thotë Sumeja, duke mos ditur se shoqja e saj është maqedonase ata ndaluan dhe filluan t’i provokojnë me fjalë si shqiptarë të ndyrë, terroristë të mallkuar”.

Pasi që Sumeja dhe shoqja e saj nuk kanë reaguar dhe kanë vendosur të tërhiqen, pas disa minutave përsëri janë takuar me të njëjtin grup, ndërsa Sumeja vendosi t’i pyes se çfarë është problemi, pse u sulmuan dhe çfarë të keqe u ka bërë.

Grupi prej tre personave i janë përgjigjur se u pengon veshja e saj, pas së cilës ka reaguar shoqja krishtere duke e mbështetur Sumeja-n, gjë e cila ka ngjallur zemërim tek grupi i tre personave maqedonas. Në atë moment, vajza nga grupi i sulmuesve është përpjekur t’ia heq shaminë Sumeja-s, mirëpo pas disa lëndimeve të lehta kanë arritur të largohen.

“Filluan mua të më quajnë se jam terroriste, shqiptare e ndyrë dhe se ky është një vend i krishterëve dhe një ditë të gjithë neve do të na dëbojnë. Djaloshi më kapi dorën dhe filloi të më tërheq zvarrë duke më porositur të largohem nga ky vend. Me shoqen time arritëm të tërhiqemi, por ata qëndronin pas nesh dhe na thonin ‘terroristë islamik, zhdukuni nga keni ardhur në Arabinë Saudite, ky vend është i krishterëve’. Rreth nesh kishte shumë njerëz, akush nuk ndërhyri. Të gjithë qëndronin të heshtur dhe shikonin nga anash”, deklaroi Sumeja për AA.

Sumeja: Sikurse kryqi që simbolizon fenë e tyre, shamia simbolizon fenë time

Sumeja thotë se në Shkup është rritur dhe jeton, ndërsa sulmi të cilin nuk e ka imagjinuar se mund t’i ndodh, nuk e ka shokuar, por e ka tronditur tejmase. Ajo thotë se ky rast nuk do të ketë efekt që të ndalojë të shoqërohet me maqedonas, turq apo me përkatësitë tjera etnike që jetojnë në Maqedoni.

“Kjo shami nuk është një simbol i terrorizmit, por është simbol i një feje. Njëjtë sikurse një maqedonas që mban kryqin, që është simbol i fesë së tyre, edhe kjo shami është simboli fesë sime. Ashtu si unë që respektoj simbolin e tyre, ashtu duhet ata të respektojnë simbolin tim, sepse jetojnë në shekullin e 21 dhe duhet të ketë harmoni, dashuri dhe paqe mes nesh, e jo urrejtje”, shprehet Sumeja, duke porositur se jeta mbetet për të rinjtë që nesër të përhapin paqen, e jo të urrehen dhe të ndahen në bazë fetare ose kombëtare.

Sipas saj, kjo ngjarje e pakëndshme ndodhë për arsye të situatës aktuale politike në Maqedoni. Ajo apelon që qytetarët e Maqedonisë, veçanërisht të rinjtë mos bien në provokime dhe manipulime politike, por të luftojnë që të ketë harmoni mes qytetarëve këtij vendi multi-etnik dhe multi-kulturor, pa marrë parasysh se cilës fe apo përkatësi etnike i takojnë.

“Sot mua më ndodhi, nesër mund t’i ndodh dikujt tjetër. Jo vetëm një shqiptari, por mund edhe një shqiptar apo një turk të sulmojë një maqedonas. Mos të lejojmë një gjë të tillë të ndodh, por të kontribuojmë për paqe dhe harmoni mes nesh”, apelon Sumeja tek qytetarët e Maqedonisë. /Telegrafi/