Sulmi në Barcelonë, kërkim ndërkombëtar për shoferin e furgonit (Video)

Policia spanjolle e konfirmoi zyrtarisht, atë që raportet në shtypin vendas e artikulonin prej ditësh: drejtuesi i furgonit të përplasur mbi njerëzit e pafajshëm në Barcelonë javën e shkuar është 22-vjeçari Younes Abouyaaqoub, kërkimet për të cilin janë shtrirë tani në mbarë Evropën.

Autoritetet spanjolle e lanë të kuptohet që një ditë më parë se, Abouyaaqoub mund të ketë kaluar kufirin me Francën. Pamjet e reja të përftuara nga regjistrimet e kamerave të sigurisë në ditën e sulmit tregojnë se i riu është larguar nga vendngjarja në këmbë.

Gazeta “El Pais” botoi 3 foto, ku 22-vjeçari shihet duke ecur me syze dielli përmes tregut “La Boqueria”, ndërsa kalon mes njerëzve që largohen në panik nga “Las Ramblas”.

Policia po heton mundësinë që, gati 90 minuta më vonë, i dyshuari të ketë qëlluar me thikë e vrarë një spanjoll për t’i grabitur makinën. 34-vjeçari Pau Pérez bëhet kështu viktima e 15 e konfirmuar e sulmeve terroriste në Spanjë, transmeton tch. 13 persona u vranë kur furgoni i drejtuar nga marokeni Abouyaaqoub u lëshua mbi turmën e njerëzve në “Las Ramblas” dhe një grua vdiq gjatë sulmit të dytë disa orë më vonë në qytetin e Cambrilsit.

Nga 12 personat e dyshuar për organizimin e akteve të terrorit, Abouyaaqoub është i vetmi që mbetet në arrati. Përveç 5 pjesëtarëve të celulës, të ekzekutuar nga forcat e rendit në Cambrils, 4 të tjerë janë në pranga dhe mbetjet e dy personave të vdekur nga shpërthimi në një vilë të Alcanarit të mërkurën, pritet të identifikohen sa më shpejt që të jetë e mundur.