Sqarimi i kompanisë “ELKOS Group” për mishin me afat të skaduar

Pas raportimit në media se në kompaninë “ELKOS Group”, respektivisht në Qendrën tregtare “ETC” dhe Fabrikën e Përpunimit të Mishit “ELKOS”, javën e kaluar, forcat e rendit kanë gjetur 6 mijë e 600 kg mish pa afat, ka reaguar menaxhmenti i kësaj kompanie.

Ata kanë thënë për Telegrafin se e respektojnë ligjin dhe i kryejnë të gjitha  obligimet ligjore që bien mbi ta.

Më poshtë mund ta lexoni sqarimin e plotë të Menaxhmentit të “ELKOS Group”:

“Pas vizitës së realizuar nga Inspektorati i Ushqimit dhe Veterinës në kompaninë “ELKOS”, këta të fundit kanë hasur në një sasi të produkteve (test produkteve) me mbishkrimin “Malli është për asgjësim”, mallra këto që nuk ishin destinuar për konsum final.

Duhet gjithashtu të theksohet se këto produkte ishin të izoluara nga pjesa e produkteve tjera që ishin në rregull.

Sipas ligjeve në fuqi çdo hedhje duhet të jetë në formë të organizuar, duke e bërë grumbullimi në baza periodike nga të gjithat pikat e shitjes, pastaj grumbullohet në qendër për asgjësim dhe behet ftesa e Inspektoratit për asgjësim, për të bërë hedhjen dhe asgjësimin e saj.

E tërë sasia e përcaktuar për asgjësim ishte e përgatitur sipas standardeve të përcaktuara me ligje dhe rregullave të asgjësimit.

Ne kuadër te prodhimtarisë se mishit krahas prodhimit standard kemi edhe prodhimet e reja – testuese – të cilat nuk e kanë destinacionin final shitjen, deri në momentin kur produkti i plotëson të gjitha kushtet e përcaktuara me ligje.

Në raste të caktuara kur fusim në funksion makineri të reja, dhe kur produktet e prodhuara ende nuk e kanë formën finale, për këtë arsye këto produkte  vendosen në kategorinë (jo për shitje) “Malli për asgjësim”.

Te gjitha importet janë legale dhe nuk ka fare vend për shqetësim. Kompania “ELKOS” në asnjë moment nuk merret me importe jo legale, dhe çdo mall i importuar i nënshtrohet kontrolleve dhe procedurave ligjore, konform ligjeve në fuqi të Republikës së Kosovës.

Sa i përket mallit të pa deklaruar, grupi “ELKOS” posedon kartelën e importit legal, dhe kartelën e prodhimtarisë, ku shihet koha kur ka ardhur malli, sasia e arritur, dhe çdo dalje e bërë që i përgjigjet atij malli.

Duhet cekur që kohëve të fundit kontrollet e mallit janë rritur në maksimum, dhe se çdo maune qe ka për destinacion kompaninë “ELKOS GROUP”, i nënshtrohet kontrolleve me sigurinë maksimale, dhe asnjëherë nuk kemi hasur as problemin më të vogël”.

Ndryshe, mediat kanë raportuar se në qendrën tregtare ETC dhe Fabrikën e Përpunimit të Mishit “ELKOS” në qytetin e Pejës, javën e kaluar, forcat e rendit kanë gjetur 6 mijë e 600 kg mish pa afat e të cilit nuk i dihej as prejardhja.

Për rastin është prononcuar edhe zyrtari për informim në Agjencinë e Veterinës dhe Ushqimit (AVU), i cili ka theksuar se “në “ETC” janë asgjësuar 500 kg mish pule, peshk dhe prodhime peshku, të cilat sipas tij, nuk i kanë përmbushur kushtet për konsum.

“Kurse në ‘ELKOS’, në fshatin Zahaq të Pejës, janë gjetur 3100 kg mish gjedhi pa të dhëna mbi prejardhjen e mishit, kurse 3000 kg kanë qenë produkte të tjera të mishit si: salsiqe, sallama të pulës, suxhuk shtëpiak, mish i tymosur etj, të cilat kanë qenë të prishura”, tka thënë Thaçi, nga AVU./Telegrafi/