Spalletti flet për historitë me Tottin dhe Icardin: Nuk i kam larguar unë, përkundrazi i kam dashur shumë të dy

Luciano Spalletti është rikthyer për të folur për dy lojtarë me të cilët u raportua se ka pasur marrëdhënie të tensionuara.

Trajneri italian ishte në vitin 2017 te Roma, kur Totti në fund të sezonit u tërhoq nga futbolli pas disa mosmarrëveshjeve me të.

Ndërkohë dy vite më vonë, njëri nga idhullit e tifozërisë së Interit, Mauro Icardi pati probleme me Spallettin dhe u largua në drejtim të PSG-së.

Në një intervistë për DAZN, Luciano Spalletti është rikthyer për të folur për dy kapitenët, të Romës dhe Interit.

Tekniku italian ka thënë se i ka dashur të dy shumë, madje ka bërë gjëra për ta që për të tjerë futbollistë nuk i ka bërë.

Ai ka deklaruar se Totti u largua nga futbolli edhe pse e dinte se në fund të sezonit do të largohej Spalletti nga Roma.

“Kush ka qenë i pranishëm e di shumë mirë sa shumë i kam dashur. Për ata kam bërë gjëra që për lojtarë të tjerë nuk i kam bërë”.

“Më bezdis fakti kur thonë se unë i kam bërë të ndalen, nuk është fare e vërtetë. Totti u tërhoq kur të gjithë e dinin që unë do të largohesha në fund të vitit, mund edhe të kishte vazhduar”.

“Icardi u largua kur erdhi Conte, jo me mua. Ata mund ta kishin përdorur, ishte një lojtar i Interit”, u shpreh trajneri italian. /Telegrafi/