Sot nis gjykimi i serbit Zoran Gjokiq nga Peja, i dyshuar për krime lufte

Në Departamentin Special për Krimet e Luftës në Gjykatën Themelore në Prishtinë do të fillojë sot gjykimi i Zoran Gjokiq nga Peja, i cili akuzohet për veprën penale të krimeve të luftës.

Zoran Gjokiq akuzohet se gjatë muajve mars-prill të vitit 1999, në lagjen ‘Kristal’ të Pejës, ka hyrë dhunshëm nëpër shtëpitë e shqiptarëve lokalë dhe i ka detyruar të largohen nga shtëpitë e tyre. I njëjti është parë edhe në zonën e Rrokaqiellit, po në atë periudhë.

Lajmin e ka konfirmuar për mediat kosovare avokati i tij Ljubomir Pantoviq.

Pantoviq tha se Gjokiq u arrestua në fillim të shkurtit të këtij viti me dyshimin se kishte kryer krime lufte sepse ai dyshohet se kreu dy vrasje gjatë luftës në Pejë.

Ai shtoi se deri tani janë mbajtur dy seanca dëgjimore paraprake, në të cilat Gjokiq u deklarua i pafajshëm.

“Sipas mendimit tim, nuk ka prova të këtij krimi. Gjyqi po fillon sot dhe besoj se do të zgjasë katër, pesë ditë pune,” tha Pantoviq, duke shtuar se ky me siguri do të jetë një gjykim i vështirë.

Telegrafi ka raportuar në vazhdimësi për rastin e Gjokiq.

Gjokiq u arrestua nga Policia e Kosovës më 2 shkurt të këtij , në pikën kufitare të Jarinjes. Lidhur me këtë rast “Radio 1” ka raportuar që nga fillimi. /Njeshi/