Skandali i përgjimit të opozitës ruse në Beograd, nënshtrim i sektorit të sigurisë së Serbisë ndaj Rusisë

Politikani Vladimir Kara-Murza thotë se ministri serb i Punëve të Brendshme, Aleksandar Vulin organizoi personalisht përgjimin e opozitarëve rusë dhe konfirmon se Qeveria e Serbisë është e gatshme t’i nënshtrojë shërbimet e saj të sigurisë ndaj Vladimir Putinit.

Kjo sipas opozitarit rus Kara-Murza po bëhët për të kënaqur dhe ruajtur mbështetjen e Kremlinit zyrtar.

“Në maj të vitit të kaluar, Vulin ishte në Moskë për të dorëzuar transkriptet e bisedimeve tona nga takimi në Beograd. Më pas ai u takua me Nikolai Patrushevin dhe më pas ata formuan të ashtuquajturin Grup Punues për Luftën kundër Revolucionit me Ngjyra”, deklaroi Kara-Murza në një intervistë për Nova.

Ish-ministri i Policisë, i pari pas ndryshimeve të 5 tetorit, Bozho Preleviq është i bindur se përgjimet kanë ndodhur vërtet.

Preleviq është shprehur se ka informacione se shumica e opozitarëve nga Rusia janë nën kontrollin e vazhdueshëm të Shërbimit Federal rus të Sigurisë (FSB) dhe se pikërisht ajo ka njoftuar shërbimet serbe për qëndrimin e tyre në Beograd.

“Në bazë të kësaj, Agjencia e Informacionit të Sigurisë (BIA) ka bërë regjistrimin dhe monitorimin. Më vonë mësova se ata falënderuan autoritetet serbe në televizionin kombëtar rus për këtë akt”, deklaroi Preleviq.

Lexo po ashtu Aleksandar Vulin dhe BIA serbe po bashkëpunojnë me shërbimet sekrete të Kremlinit për të shtypur opozitën në Serbi dhe Rusi

Opozitarët nuk janë terroristë, nëse nuk janë nga Rusia dhe Serbia

Ai shtoj se për shumë arsye është e diskutueshme monitorimi dhe regjistrimi i opozitarëve rusë.

“Ata nuk janë terroristë, por njerëz që kanë pikëpamje të ndryshme nga presidenti aktual i Rusisë. Është e diskutueshme t’i ofrohet Putinit një shërbim të tillë, sepse në këtë mënyrë ju e lidhni në thelb shërbimin tuaj me atë rus. Është e papranueshme që shërbimi civil të ndërhyjë në punët e brendshme të një shteti tjetër në atë mënyrë”, shton Preleviq.

Nga ana tjetër, inspektori në Drejtorinë e Policisë Kriminale (UKP), Milan Dumanoviq, e interpreton historinë për përgjimin e opozitarëve rusë si konfirmim se autoritetet në Serbi dhe Rusi ushqejnë një sistem në të cilin opozitarët janë në fakt kundërshtarë të shteti.

“Në Rusi jeta e opozitës është shumë e vështirë dhe thuajse inekzistente, ndërsa në Serbi falë Vulin ka një kthesë të dukshme si shërbime në Lindje. Problemi është se shërbimet tona janë në varësi të të gjithëve. Në këtë rast, Rusia dhe në një rast tjetër, ata bënë të njëjtën gjë me agjencitë perëndimore të sigurisë. Praktikisht janë bërë shërbime për të gjithë”, thekson Dumanoviq.

Sipas Kara-Murzas, monitorimi dhe përgjimi i vazhdueshëm i përfaqësuesve të opozitës ruse në Beograd ka rezultuar në arrestimin e liderit të opozitës nga Rusia, Andrej Pivovarov, i cili është edhe bashkë organizator i tubimit në Beograd.

I pyetur se pse ministri i policisë në Serbi do të merrte pjesë në përndjekjen e kundërshtarëve të qeverisë në Rusi, Dumanoviq tha se atij i dukej se pas gjithçkaje qëndronin interesat personale të Aleksandër Vulin.

“Ai po përpiqet t’i bëjë lajka qeverisë ruse me këtë veprim dhe të tregojë se si mbijetoi sistemi komunist në Serbi, ku opozita, për të mos thënë më së paku, trajtohet si një organizatë ekstremiste”, tha Dumanoviq.

Preleviq megjithatë, shton se lajkat e përmendura nuk do të kalojnë pa pasoja, ndonëse, siç supozon ai, Vulin e ka bërë me bindjen se Moska do t’i jetë mirënjohëse.

“Serbia nuk mendoi se si do ta shikonte Evropa. Disa vende të BE-së, vendet baltike, madje edhe Polonia, sigurisht që nuk do ta shohin mirë këtë veprim. Përfaqësuesit e pushtetit janë të detyruar t’i përgjigjen pyetjes sonë kur vendosëm të ndryshojmë kursin, sepse e gjithë kjo është krejtësisht në kundërshtim me atë që po avokon Bashkimi Evropian”, përfundon Preleviq.

Lexo po ashtu Përgjimi i opozitës ruse në Beograd, Von Cramon: Serbia duhet të zgjedh nëse dëshiron t'i bashkohet BE-së apo të vazhdoj të rreshtohet me Moskën dhe Pekinin

Vulin bënte tregti me Patrushevin

Preleviq thekson se fakti që as kryeministrja Ana Brnabiq dhe as presidenti Aleksandar Vuçiq gjoja nuk kanë ditur për takimet e Vulin me sekretarin rus të Sigurisë, Nikolai Patrushev, sugjeron se ministri i Policisë në fakt e ka shkëmbyer atë informacion për tubimin në Beograd me ndihmën e premtuar nga Rusia.

“Kjo ndihmë nuk është në energji, sepse ne paguajmë shtrenjtë për të, por në shtypjen e protestave të mundshme në Serbi, të cilat do të karakterizoheshin si një ‘revolucion me ngjyra’. Kjo do të thotë se Vulin zgjodhi palën ruse dhe se ata presin ndihmën ruse në protesta për skenarin më të keq”, ka përfunduar Preleviq.

Serbia dhe Rusia në fshehtësi kanë formuar një grup të përbashkët pune për të luftuar kundër “revolucioneve me ngjyra”, detyra e të cilit është të shtyp demonstratat dhe organizimet masive të qytetarëve.

Përveç kësaj, një organ i përbashkët i autoriteteve serbe dhe ruse është caktuar që të mbikëqyrë liderët e opozitës, mediat e pavarura dhe organizatat e shoqërisë civile.

Për më tepër këto dy vende, janë duke u munduar aktivisht që protestat qytetare dhe kundërshtimin e ndryshëm opozitar dhe të opinionit publik në vendet e tyre, ta lidhin pa fakte me ndikimin e aktorëve të ndryshëm të huaj, me qëllim të njollosjes së aktiviteteve që kundërshtojnë qeveritë e tyre. /Telegrafi/