Shteti të mos jetë investitorë në Trepçë

Ligji, e as statuti për Trepçën nuk do të jenë efektivë nëse shteti është investitorë, kështu ka thënë drejtori i Odës Ekonomike Amerikane në Kosovë (OEAK), Arian Zeka gjatë një interviste për Telegrafin.

“Asnjë ligj për Trepçën nuk mund të sjell efekt, nëse vet shteti është investitor kryesor dhe për dy arsye; për shkak se shteti është investitor kryesor, ai do të synoj që sërish në strukturat udhëheqëse njerëzit e saj dhe e dyta është se shteti ka kufizime financiare që të investoj në rivitalizimin e një ndërmarrje të madhe strategjike”, tha ai.

Zeka thotë se për ta ringjallur Trepçën duhen investime nga jashtë.

“As ligji dhe as statusi i ardhshëm i Trepçës nuk do të sjell rezultatet e duhura, nëse nuk hap rrugë investimeve të huaja, sidomos investimeve private. E ka të pamundur që shteti të investoj dhe t’ia kthej imazhin e duhur që Trepça e ka pasur dikur. Duhet ta kthejmë në një ndërmarrje të cilën mund të bazohemi në krijimin e vendeve të reja të punës, rritjen e eksporteve dhe zhvillimin ekonomik”, ka thënë Arian Zeka.

Ndryshe Bordi i Trepçës ka hartuar një draftstatut por që ka hasur në kundërshtime të Sindikatës së Punëtorëve të Trepçës. /Telegrafi/