Shpërthejnë talljet e serbëve në rrjetet sociale: Treni arrin në Rashkë dhe nga Rashka vazhdon prapa! (Foto)

Përdoruesit e rrjeteve sociale kanë publikuar komente dhe imazhe nga më të ndryshmet rreth tentativës serbe për futjen e trenit në territorin e Kosovës.

Treni, i cili planifikohej të riniste linjën Beograd-Mitrovicë, ka arritur vetëm deri në Rashkë dhe është kthyer prapa për në Beograd.

Nga jashtë, treni, të cilit iu ndalua hyrja në Kosovë, kishte slogane serbomadhe mes të cilëve edhe “Kosova është Serbi”. Ndërsa brendësia e tij ishte e dekoruar me afreske nga manastiret ortodokse që ndodhen në Kosovë.

Lexo po ashtu TË GJITHA LAJMET PËR TRENIN SERB QË U PËRPOQ TË HYNTE NË KOSOVË

Kryeministri serb, Aleksandar Vuçiq, ka thënë se ishte ai që e vendosi ta ndalte trenin, në mënyrë që të mbroheshin jetët e njerëzve dhe të pengohej ndonjë konflikt më i gjerë.

Sidoqoftë, përdoruesit e rrjeteve sociale kanë reaguar përmes komenteve dhe fotografive satirike për t’i ulur paksa tensionet.

“Linja e radhës që do ta hapim është Serbia deri në Tokio”, ishte një nga komentet.

Një përdorues i Twitterit e ka shkruar se Bosnja e Hercegovina do të nisë një tren special në linjat Sarajevë-Zagreb dhe Sarajevë-Beograd, duke ia bashkëngjitur edhe një fotografi me një tren me mbishkrimin “Byreku është me mish” – transmeton Telegrafi.

“Arriti treni i Vuçiqit deri në Rashkë, ndërsa nga Rashka u kthye prapa!!!”, është përshkrimi i një tjetër fotografie.

Nuk ka munguar edhe krahasimi me filmat. “Na shpërtheu goma, duhet të hipim në tren”, ishte një përshkrim që shoqërohej me fotografi.

“Asgjë nëse Ivica nuk këndon në tren”, ishte komenti i radhës.

“Kosova është Serbi vetëm në parashikimin e motit”, thotë një komentues tjetër. /Telegrafi/