Shpenzoni si Beckham – Ferrari 360 Spider i yllit të futbollit ofrohet për shitje për 135 mijë dollarë

Është shfaqur një mundësi për tifozët e futbollit dhe tifozët e Ferrarit për të përmbushur të dy kënaqësitë e tyre, pasi Ferrari 360 Spider i David Beckham i vitit 2001 po ofrohet për shitje në Bibury të Mbretërisë së Bashkuar.

Futbollisti i famshëm britanik e bleu makinën në kulmin e karrierës së tij, teksa po ndihmonte Manchester United për të fituar titullin e Premierligës në vitet 2002-2003, dhe pak para se të transferohej në Real Madrid, ku do të luante përkrah legjendave të tjera, si Zinedine Zidane, Ronaldo dhe Roberto Carlos.

Beckham i fotografuar shpesh me Ferrarin e tij, veturë e cila kishte ngjyrë “Nero” dhe kishte një interier “Sabbia”, vetura tani ka vetëm 12,713 kilometra të kaluara (7,900 milje), që do të thotë se, edhe përtej lidhjes së saj me legjendën e futbollit, ajo është një shembull i jashtëzakonshëm i llojit të vet, raporton carscoops, transmeton Telegrafi.

“Gjendja, kilometrazhi dhe historia e listës A e bëjnë këtë një nga 360-at më të veçanta”, tha Matt Bird, redaktori i PistonHeads, firma e cila ka listuar veturën. “Edhe ata që nuk janë aq të interesuar për lidhjen e futbollit, dhe thjesht pas një prej Modenasve më të mirë, do të ‘luftonin’ për ta blerë atë. Dhe për ata që janë tifoz futbolli, çfarë historie do të duhet të tregoni kur dikush ju pyet për Ferrarin tuaj”, shtoi ai.

Ferrari 360 Spider fuqizohet nga një motor V8 3.6 litërsh që prodhon 395 kuaj fuqi (294 kW/400 PS) dhe 373 njuton metër (275 lb-ft) fuqi rrotulluese, e cila është e mjaftueshme për të arritur shpejtësinë deri në 100 km. /h (62mp/h) në 4,9 sekonda. Edhe pse kjo është pak më pak mbresëlënëse këto ditë, shifra prej 8,700 rpm duhet të ju ndihmojë të impresiononi miqtë tuaj nëse ju e blini këtë ekzemplar.

PistonHeads raporton se Ferrari 360 Spiders zakonisht kushton rreth 68 mijë euro (60,000 funte – 73,394 dollarë) në Mbretërinë e Bashkuar këto ditë, por, falë origjinës së kësaj makine dhe gjendjes së saj të shkëlqyer, kërkohet një çmim i lartë. Nëse dëshironi të vozitni makinën e mëparshme të David Beckham, do t’ju duhet të paguani pak më shumë se 122 mijë euro (110,000 funte – 134,556 dollarë). /Telegrafi/