Shpella e Hënës ‘mund të jetë bazë’ për astronautët e ardhshëm

Hëna është armiqësore ndaj jetës njerëzore dhe sipërfaqja e saj është e ekspozuar ndaj niveleve të fuqishme të rrezatimit kozmik – por ekspertët besojnë se shpellat nëntokësore mund të jenë “të përshtatshme për qëllime banimi”.

Një shpellë nëntokësore që shtrihet dhjetëra metra nën një gropë të hapur në Hënë, është zbuluar e cila mund të jetë një bazë e mundshme për astronautët e ardhshëm, thonë shkencëtarët.

Ky është tuneli i parë hënor i gjetur i cili mund të jetë i qasshëm për njerëzit, sipas studiuesve, transmeton Telegrafi.

Kalimi i zgavruar shtrihet nën një gropë rreth 100 metra të gjerë në Detin e Qetësisë, një rajon i errët në anën e afërt të hënës, i cili është i dukshëm me sy të lirë.

Rajoni është gjithashtu vendi ku njerëzit e parë në Hënë, Neil Armstrong dhe Buzz Aldrin, u ulën në vitin 1969. Shpella vlerësohet të jetë 30-80 metra e gjatë, rreth 45 metra e gjerë dhe 130-170 nën sipërfaqe.

Shpellat e mëparshme të gjetura në Hënë nuk kanë asnjë pikë hyrjeje, kanë shtuar shkencëtarët. “Zbulimi historik” vjen ndërsa NASA përgatitet të dërgojë misionin e saj të parë me ekuipazh në Hënë në më shumë se 50 vjet.

Hëna është armiqësore ndaj jetës njerëzore dhe sipërfaqja e saj është e ekspozuar ndaj niveleve të fuqishme të rrezatimit kozmik – por ekspertët besojnë se shpellat nëntokësore mund të jenë “të përshtatshme për qëllime banimi”.

Leonardo Carrer, profesor në Universitetin e Trentos në Itali, tha se “për herë të parë, kanë gjetur dhe hartuar me saktësi një shpellë që është në të vërtetë e arritshme nga një gropë në sipërfaqen hënore”.

“Ishim në gjendje të merrnim modelin e parë 3D të një pjese të formës aktuale të shpellës. Ndërtimi i një baze në sipërfaqen e hënës kërkon zgjidhje inxhinierike shumë komplekse, të cilat mund të jenë më pak efektive se ato që tashmë janë ofruar nga natyra”, shtoi ai.

Sipërfaqja e Hënës është e ekspozuar ndaj rrezatimit kozmik që është deri në 150 herë më i fuqishëm se Toka. Sipërfaqja është gjithashtu e ndjeshme ndaj ndikimeve të shpeshta të meteoritëve dhe temperaturave ekstreme, që variojnë nga 127 në  minus 173 gradë Celsius. /Telegrafi/