Shkencëtarët thanë se kanë zbuluar ekzistencën e një liqeni të madh nëntokësor në Mars, duke rritur mundësinë për ekzistencën e jetës në Planetin e Kuq.

Revista amerikane “Science” raportoi se liqeni ndodhet nën një shtresë akulli në planet dhe duket se është rreth 20 kilometra i gjerë.

Ai u zbulua përmes përdorimit të një radari nga misioni eksplorues Mars Express i Agjencisë Evropiane të Hapësirës.

Uji konsiderohet një përbërës themelor për jetën.

Shkencëtarët thanë se zbulimi ofron dëshmi për mundësinë e jetës, porse nuk është provë.

Ata thanë se mund të duhen vite për të verifikuar nëse ndonjë gjë jeton në trupin e ujit.

Uji i lëngshëm besohet të ketë qenë i bollshëm në Mars rreth 3.6 miliardë vjet më parë.

Zbulimi i fundit është trupi më i madh i ujit të lëngshëm i gjetur ndonjëherë në planet.