Shkarkimi i Musliut, LDK dhe PDK heshtin për fatin e koalicionit në Prishtinë

Kryetari i Prishtinës, Përparim Rama, ka marrë vendim për të liruar nga detyra drejtorin e Shërbimeve Publike, Ilirik Musliu i cili ishte pjesë e Partisë Demokratike të Kosovës, parti e koalicionit qeverisës në kryeqytet. As nga kjo parti e as nga Lidhja Demokratike e Kosovës nuk kanë pranuar të flasin për çështjen, ndërsa njohës të fushës vlerësojnë se problemet brenda koalicionit do të ndikojnë në shërbimet e kryeqytetit.

Ankesat për prezencën e mbeturinave në rrugët e kryeqytetit nuk kanë qenë rrallëherë të përmendura.

E po të njëjtat qenë arsyetimi i kryetarit të Prishtinës, Përparim Ramës për shkarkimin e Drejtorit të Shërbimeve Publike, Ilirik Musliu, i cili vjen nga radhët e PDK-së.

Ky i fundit, pavarësisht përpjekjeve për t’u kontaktuar, nuk ka qenë i qasshëm në telefon të shtunën.

Lexo po ashtu Kaosi me mbeturina në kryeqytet, Rama liron nga detyra drejtorin e Shërbimeve Publike

E vendimin e Ramës dhe përçarjet e mundshme të partisë së tij me partnerin e koalicionit, PDK-në, nuk kanë pranuar ta komentojnë as anëtarë LDK-së në kryeqytet.

Megjithatë, kritikat lidhur me vendimin nuk i kanë kursyer PDK-ja. Nënkryetarja e komunës nga kjo parti, Donjeta Sahatçiu, e ka cilësuar shkarkimin e bashkëpartiakut si hakmarrje të Ramës për mosmbështetjen në këmbimin e pronave.

Lexo po ashtu Shkarkimi i drejtorit të Shërbimeve Publike, nënkryetarja e Prishtinës e quan revansh politik të Përparim Ramës

Mirëpo, në organizatën “Demokracia Fillon Këtu” besojnë që kriza në koalicion nuk është për shkak të situatës me mbeturinat në qytet.

“Duket se mes këtyre qarjeve që ka koalicioni në Prishtinë, nuk ka kuptim të vazhdojë koalicioni në mes PDK-së e LDK-së për faktin që asnjëra palë nuk duket e sinqertë. Nëse PDK ka pa manovrime të Ramës rreth pronave në Badovc dhe nuk ka pasur reagim, është problem në vete po sidomos edhe Rama nëse ka qenë aq i brengosur me çështjen e mbeturinave në qytet do duhej që paraprakisht të merrte veprime”, ka deklaruar Shemsi Jashari, drejtor i “Demokracia Fillon Këtu”.

Sipas tij, problemet në koalicion do të vihen re në shërbimet ndaj qytetarëve.

“Ajo çka dihet është se problemet e koalicionit do ndikojnë në perfomancën jo të mirë të kësaj qeverisje në komunën e Prishtinës dhe si rezultat, qytetarët nuk do marrin shërbimet siç duhet dhe siç meriton t’i ketë kryeqyteti”, ka vijuar ai.

Pas shkarkimit të drejtorit të PDK-së, nuk dihet akoma se cilat do të jenë veprimet e kësaj partie në marrëdhëniet me partnerin qeverisës, LDK-në. /Dukagjini/