Shitje rekorde në nëntë muajt e fundit për Porsche

Prodhuesi gjerman regjistroi rritje të shitjeve prej 13 për qind në tre tremujorët e parë të vitit 2021.

Një rezultat rekord në periudhën janar -shtator për Porsche – në këtë periudhë, prodhuesi nga Stuttgarti dorëzoi 217,198 automjete për klientët në të gjithë botën, me një rritje të shitjeve prej 13 për qind në krahasim me të njëjtën periudhë në vitin 2020.

Kërkesa është rritur në të gjitha rajonet e shitjes, dhe një rritje veçanërisht e fortë është regjistruar në Shtetet e Bashkuara.

Modelet më të suksesshme janë SUV -të e pritshme, Porsche Cayenne me 62.451 njësi të dorëzuara, dhe Macan me 61.944 makina të shitura.

Modeli krejtësisht elektrik Taycan ishte gjithashtu jashtëzakonisht i popullarizuar, pasi 28,640 nga këto makina iu dorëzuan klientëve, duke tejkaluar kultin Porsche 911 (27,972 automjete të shitura në tremujorin e tretë).

Gjithsej 15,916 klientë zgjodhën Porsche 718 Boxster dhe 718 Cayman, dhe dërgesat e Panamera mbetën në nivelin e një viti më parë me 20,275 njësi të shitura.

Edhe një herë, rritja më e madhe e kërkesës u regjistrua në SHBA – Porsche dorëzoi 51,615 automjete atje në nëntë muajt e parë, një rritje prej 30 për qind në të njëjtën periudhë të vitit të kaluar.

Në të gjithë kontinentin amerikan, Porsche shiti një total prej 63,025 automjetesh, 29 për qind më shumë se në tre tremujorët e parë të vitit 2020.

Kina, e cila është tregu më i madh i vetëm në botë, kontribuoi me 69,789 automjete në numrin e përgjithshëm të makinave Porsche të dorëzuara, me një rritje prej 11 për qind.

Dërgesat në rajonin e Azi-Paqësorit, Afrikën dhe Lindjen e Mesme u rritën me 12 për qind në total. Në këto zona, Porsche shiti 97,841 automjete.

Nga ana tjetër, 56,332 makina iu dorëzuan klientëve në Evropë, që është një rritje prej 2 për qind në krahasim me vitin e kaluar. Në Gjermani, kërkesa u rrit me 9 për qind, me 19,099 njësi të dorëzuara. /Telegrafi/