SHBA po blen gjashtë milionë fuçi nafte

Qeveria amerikane planifikon të blejë deri në gjashtë milionë fuçi nafte për rezervat strategjike, pasi dëshiron të përfitojë nga çmimet e favorshme dhe të mbushë rezervuarët, tha një burim.

Nëse plani zbatohet, kabineti i presidentit amerikan, Joe Biden do të blejë naftën më të madhe në historinë e prokurimit për rezervat strategjike.

Kabineti dëshiron të rimbushë rezervat pasi kishte shitur deri në 180 milionë fuçi në vitin 2022, gjithashtu më së shumti në histori, për të siguruar furnizimin pasi u vendos tavani i çmimit të naftës nga Rusia për shkak të pushtimit rus të Ukrainës. Grupi G7 ka kërcënuar siguruesit dhe transportuesit me sanksione nëse i blejnë fuçitë ruse për më shumë se 60 dollarë.

Qeveria amerikane kishte shitur fuçi me një çmim mesatar prej 95 dollarëve dhe tani po mbush rezervat duke blerë më shumë se 50 milionë fuçi, shkruan reuters.

Rezervat në pronësi federale mbahen në shpella të mëdha kripe nëntokësore në katër vende përgjatë Bregut të Gjirit, sipas të dhënave të Departamentit të Energjisë.

Ministria kishte vendosur një çmim prej 79,99 dollarëve për fuçi për ciklin e ri të blerjes dhe vendosi të shfrytëzojë mundësinë pasi fuçia aktualisht kushton pak më pak se 72 dollarë në tregun vendas.

Çmimet janë aktualisht nën nivelin e vendosur nga ministria, por mund të rriten në afat të shkurtër për shkak të konfliktit në Lindjen e Mesme dhe faktorëve të tjerë. Në muajin prill, SHBA anuloi blerjen e saj për shkak të rritjes së çmimeve.

Shtetet e Bashkuara aktualisht mbajnë 380 milionë fuçi rezerva strategjike, kryesisht naftë “të thartë” me përmbajtje të lartë squfuri, pasi rafineritë amerikane janë kryesisht të pajisura për të përpunuar këtë lloj nafte. Niveli më i lartë i rezervave u regjistrua në vitin 2009, kur arriti në 727 milionë fuçi. /Telegrafi/