Shasha: Shkrirja e Ministrisë së Integrimeve në atë të Punëve të Jashtme është gabim

Dy partitë të cilat pritet të formojnë Qeverinë e re, Lëvizja Vetëvendosje dhe Lidhja Demokratike e Kosovës, janë pajtuar që Qeveria e ardhshme e Kosovës nuk do të ketë më shumë se 12 ministri. Që të dyja partitë kanë theksuar se formati qeverisës do të jetë me 12 ministri, të cilët do të kenë nga dy zëvendësministra.

Drejtori Ekzekutiv i Institutit Epik, Demush Shasha, në një intervistë dhënë Telegrafit ka thënë se kjo iniciativë që pritet ta marr Qeveria në ardhje është e mirëpritur.

Sipas tij organizimi i ministrive mund të ndikojë në përshpejtim të reformave.

“Kosova ka pasur një qeveri jashtëzakonisht të madhe me një numër të madh të ministrave, zëvendës ministrave, numri të këshilltarëve, koordinatorëve, dhe zvogëlimi i ministrive është i mirëseardhur. Pra zvogëlimi i numrit të ministrive në një numër funksional të ministrave brenda qeverisë, të cilët mund të kryejnë detyrat e veta në formë efektive. Prandaj organizimi i tyre mund të kontribojë në një përshpejtim të reformave në rrugën tonë me një racionalitet më të madh të shpenzimeve”, ka thënë ai.

Lexo po ashtu Qeveria e ardhshme me 12 ministri, grafika që tregon se si mund të bëhet shkrirja e 21 ministrive

Mirëpo, Shasha ka përmendur një problem tek shkrirja e ministrive. Ai ka thënë se do të jetë gabim nëse shkrihet Ministria e Integrimeve Evropianë në Ministrinë e Jashtme.

“Shkrirja e Ministrisë së Integrimeve në Ministrinë e Jashtme do të jetë një gabim që do të shkaktojë pasoja në rrugën integruese. Ne kemi rekomanduar që Ministria e Integrimeve të shkrihet në zyrën e kryeministrit, pasi që aty e ka vendin”, ka theksuar ai duke përmendur dhjetë arsyet pse kjo ministri duhet të shkrihet në zyre të kryeministrit.

“Së pari, procesi i integrimit është proces i rëndësisë më të madhe nacionale. 90 për qind të qytetarëve janë pro antarësimit të Kosovës në BE. Një përgjegjësi kaq e madhe, një mbështetje po ashtu kaq e madhe qytetare nuk mund të delegohet në një digaster ministror dhe të ndahet nga përgjegjësia e kryeministrit. Së dyti, procesi i integrimit duhet kuptuar që nuk është çështje e punëve të jashtme, procesi i integrimit ka të bëjë me reformat e brendshme, dhe nuk mund të ndahet si proces reformator nga kryeministri i vendit apo ta quajmë reformatori. Dhe e treta, procesi i integrimit është proces kordinues ku ka plotë institucione që duhet përfshirë, dhe të cilat duhet t’i ekzekutojnë një numër detyrash. Si i tillë kërkohet një hirearki, dikush që jep urdhëra, dhe në Qeveri është vetëm një person që jep urdhëra, e ai është kryeministri”, ka theksuar ai.

Ndërsa shkrirjen e ministrive të tjera ai e sheh si proces që mund të bëhet.

“Lidhur me shkrirjen e ministrive të tjera, kjo mund të bëhet siç është propozuar në diskurs publik. Pasi që nuk kemi parë ndonjë ëvshtirësi në bashkimin e këtyre ministrive. E vetmja gjë që e kemi nënvizuar është ajo me Ministrinë e Integrimeve”, është shprehur ai.

Ndryshe partitë që pritet të vijnë në pushtet LVV dhe LDK këtë javë kanë mbajtur takimin e katërt me radhë për të koordinuar programin e tyre./Telegrafi/