Sekuestrohen tri armë zjarri në rajonin e Prishtinës – arrestohen katër persona

Katër persona janë arrestuar këtë të enjten nga Policia e Kosovës, si të dyshuar për kanosje.

Policia njofton se arrestimi i tyre është bërë në dy raste të ndara dhe të njëjtëve u janë sekuestruar tri armë zjarri.

“Sot nga zyrtarët policor në dy raste të ndara, janë arrestuar 4 persona të dyshuar për kanosje dhe janë sekuestruar tri armë zjarri. Sekuestrimi i armëve është kryer në dy raste dhe lokacione të ndryshme”, thuhet në komunikatën për media.

Tutje, bëhet e ditur se njëri nga të dyshuarit është arrestuar në një lokal në rrugën “19 Qershori” në Podujevë.

“Pas një mosmarrëveshje dhe ekspozimit të armëve, është arrestuar një person i dyshuar për veprën kanosje, si dhe i është sekuestruar një armë zjarri e tipit Zoraki dhe një karikator”.

Po ashtu në të njëjtin lokal, thuhet se është sekuestruar edhe një armë e tipit TT me një karikator dhe gjashtë fishekë, përderisa dyshuari (i identifikuar nga ana e policisë), ndodhet në arrati.

Ndërsa, sipas policisë, rasti i dytë i cilësuar si kanosje ka ndodhur me datën 03.01.2023, në fshatin Miradi e Ulët – Fushë Kosovë.

“Lidhur me këtë rast policia ka identifikuar tre persona të dyshuar. Sot me urdhër të gjyqtarit të procedurës paraprake është kryer kontrolli në shtëpinë e personave të dyshuar dhe objekte përcjellëse, ku policia ka arrestuar tre personat e dyshuar dhe ka sekuestruar: një armë zjarri Ak-47, tre karikatorë dhe dy fishekë”.

Personat e arrestuar në të dyja rastet me vendim të prokurorit janë dërguar në mbajtje. /Telegrafi/