Departamenti Amerikan i Luftës ka publikuar foto të Sekretarit të Luftës, Pete Hegseth, duke ushtruar me ushtarë amerikanë të stacionuar në Malajzi.
"Ministri Hegseth u bashkua me luftëtarët tanë për një ushtrim fizik në mëngjes në Kuala Lumpur, Malajzi.”
Fotot vijnë vetëm një muaj pasi Hegseth njoftoi se i gjithë personeli luftarak do të duhej të përmbushte standardet më të larta fizike për të mbajtur postet e tyre.
Më 30 shtator, gjatë një fjalimi në Bazën e Korpusit të Marinës në Quantico të Virxhinias, Hegseth i bëri thirrje departamentit të "rivendosë zbatimin e pamëshirshëm, të paanshëm dhe të arsyeshëm të standardeve".
Me atë rast, ai theksoi se "çdo anëtar i forcës së bashkuar, pavarësisht gradës, duhet të bëjë një provim dy herë në vit, si dhe të përmbushë kërkesat e gjatësisë dhe peshës dy herë në vit".
Përveç kësaj, anëtarët e forcës së bashkuar do të duhet të kryejnë stërvitje fizike çdo ditë, e cila, sipas Hegseth, është tashmë standarde në shumë njësi.
"Nëse Sekretari i Luftës mund t'i nënshtrohet rregullisht stërvitjes rigoroze fizike, kështu mund të bëjë çdo anëtar i forcave tona të kombinuara", vërejti ai.
Ai u ankua kundër "ushtarëve të shëndoshë" dhe "gjeneralëve dhe admiralëve të shëndoshë në korridoret e Pentagonit", duke argumentuar se standardet fizike për anëtarët e ushtrisë amerikane ishin përkeqësuar dhe se ishte koha për të rritur standardin.
Kujtojmë se në shtator, presidenti amerikan Donald Trump lëshoi një urdhër ekzekutiv që e riemëronte Departamentin e Mbrojtjes në Departamentin e Luftës.
Vetëm disa javë pasi Trump lëshoi urdhrin e tij ekzekutiv, Sekretari deklaroi se "epoka e Departamentit të Mbrojtjes ka mbaruar".
"Nga ky moment e tutje, misioni i vetëm i Ministrisë së Luftës të sapokrijuar është ky: Luftimi. Përgatitja për luftë dhe përgatitja për fitore." /Telegrafi/
