Rritja e të ardhurave buxhetore në Shqipëri, e ndikuar nga rimëkëmbja e ekonomisë

Rritja e të ardhurave dhe shpenzimeve buxhetore në Shqipëri vitin e kaluar ka ardhur si rezultat i ecurisë së mirë ekonomike dhe miradministrimit fiskal, u shpreh Ministrja e Financave dhe Ekonomisë, Delina Ibrahimaj në një konferencë për shtyp.

Ministrja Ibrahimaj prezantoi të dhënat kryesore të ecurisë ekonomike për vitin 2021 dhe muajin janar 2022

Ministrja informoi se të ardhurat dhe shpenzimet për vitin 2021 kanë shënuar rritje në krahasim me vitin paraardhës.

Të ardhurat janë rritur 20 për qind në fund të vitit të kaluar në krahasim me vitin 2020 dhe 11 % në krahasim me vitin 2019, ndërkohë që shpenzimet janë rritur me 21.2 për qind në krahasim me vitin 2020 dhe 11.2 për qind në krahasim me vitin 2019.

Sipas Ibrahimaj, gjatë vitit 2021 Ministria e Financave nuk ka ndërmarrë asnjë iniciativë për rritjen e taksave, që mund të ndikonte në këtë rezultat pozitiv.

Në anën tjetër, Ibrahimaj ka shtuar se shpenzimet janë rritur me 31.4 për qind në raport me një vit më parë dhe me 5.8% në raport me vitin 2019.

“Kjo rritje investimesh është materializuar në rritje ekonomike dhe vjen si efekt i një politike të qeverisë shqiptare, e cila ka nxitur stimulin fiskal, ka nxitur investimet, me qëllim nxitjen e kërkesës dhe të rritjes ekonomike”, ka thënë Ibrahimaj.

Ministrja Ibrahimaj ka shtuar gjithashtu se reforma e fiskalizimit [faturimi online] ka rritur formalizimin e ekonomisë dhe si rrjedhojë ka sjell rritje të të ardhurave.

Një tjetër faktor në rritjen e të ardhurave është rritja ekonomike e vitit 2021 në raport me vitin 2020, ku për 9 mujorin e vitit 2021 rritja ekonomike llogaritet të jetë 10.33 për qind, ka theksuar Ibrahimaj.

Sipas ministres, ecuria ekonomike e vitit 2021 dhe të dhënat paraprake të vitit 2022 reflektojnë një dalje të Shqipërisë nga kriza e pandemisë dhe e tërmetit, si dhe një rikuperim të shpejtë të aktivitetit ekonomik.

“Të ardhurat, treguesit e punësimit treguesit e tregtisë së jashtme janë pozitive dhe na bëjnë të mendojmë se parashikimet tona për një rritje ekonomike për vitin 2022 në nivelin 4 për qind janë të qëndrueshme dhe plotësisht të arritshme”, u shpreh Ibrahimaj.

Nga ana tjetër, Ministrja theksoi se politikat e ndërmarra nga Ministria e Financave dhe Ekonomisë do të synojnë uljen dhe reduktimin e borxhit publik, si dhe konsolidimin e financave publike, duke synuar një nivel borxhi me 75 për qind të Prodhimit të Brendshëm Bruto në fund të vitit 2024. /Telegrafi/