Rriten çmimet e ilaçeve në Maqedoni

Qytetarët nga kjo javë blejnë ilaçe më të shtrenjta për 30% nga lista pozitive.

Kjo nuk është rritja e parë që është bërë këtë vit, nga që në janar kishte edhe një rritje tjetër për 20%, thonë farmacistët. Sipas tyre, rritja është bërë vetëm nga prodhuesit farmaceutik vendor, ndërsa barnat e importuara nga kompanitë e jashtme nuk i kanë lëvizur çmimet e 90% të ilaçeve e preparateve tjera.

Qytetarët thonë se abuzimi me çmimin e barnave njëherë u bë nga pandemia, tani nga lufta në Ukrainë.

“Po çfarë barna bre, ato janë të gjitha mashtrime, a e dini çfarë do të thotë kjo të shkruajnë barna që kanë më së tepërmi profit këto barnatoret. Njerëz hani sa më tepër ushqim natyror, jo artificiale.”

“Ka barna që janë shumë të shtrenjta varet edhe nga sëmundjet, secili nuk mund ti paguaj. Ata që kanë të ardhura të ulëta e kanë vështirë ti arrijnë. Unë nuk marr shumë barna por deri në 1 mijë denarë nga lista pozitive i marr çdo muaj për tension të lartë të gjakut dhe tjerat që më duhen.”

“Për vështirësi mund të them se për mua dhe bashkëshorten nën 2 mijë denarë nuk mbes pa shpenzuar në muaj. Se a mi paguajnë ato që mi shkruan mjeku apo diçka tjetër dyshoj se ka disa shifra të pa kuptueshme. Nuk i kam parë me hollësi por që paguaj më tepër se duhet, jam i sigurt se po.”

Drejtuesit e barnatoreve thanë se kjo rritje rapide ka kaluar mbi 50% të kostove të ilaçeve brenda tremujorit të parë të këtij viti.

“Gati 30% janë ngritur çmimet nga lista pozitive, por e theksoj edhe një herë barnat që janë nga Maqedonia, të cilat janë prodhuar nga dy kompanitë farmaceutike që operojnë aktualisht këtu”, tha Aulon Ramadani, farmacist.

Nga Fondi i Sigurimit Shëndetësor thonë se me mbi 9 mijë farmaci që kanë të lidhura kontrata nuk ka rritje të çmimeve referente. Sipas Irfan Limanit përditësimi i kostove të ilaçeve bëhet në çdo 6 muaj.

“Kompetenca ligjore e Fondit është monitorimi dhe rregullimi i lartësisë së çmimeve referente të barnave nga lista pozitive, por edhe këtu si element bazë merret çmimi që e ka miratuar Ministria e Shëndetësisë”, theksoi Irfan Limani, Fondi i Sigurimit Shëndetësor.

Nga Ministria e Shëndetësisë thonë se pas negociatave me kompanitë farmaceutike, sot është marrë vendim për çmimet e reja të barnave nga kompanitë prodhuese dhe shpërndarëse të barnave.

Sipas vendimit, kompanitë pritet të rregullojnë çmimet e vendosura të barnave në tregtinë me shumicë dhe pakicë dhe pas rregullimit, çmimet e reja të reduktuara do të aplikohen nga 1 prilli./Alsat/