Rreziku për të hyrë në një kurth shumë të rrezikshëm të Hamasit – kjo dhe katër arsye të tjera pse Izraeli nuk ka nisur ofensivën tokësore në Gaza

Për më shumë se dy javë, Izraeli ka kërcënuar se do të nisë një ofensivë tokësore në Gaza.

Por rreziqet mund të jenë shumë të larta, me ministrin e jashtëm të Turqisë që paralajmëroi sot se me një operacion i tillë do të fillonte një masakër, shkruan Sky News, përcjell Telegrafi.

Sipas mediumit britanik, tanket dhe ushtarët izraelitë mbeten të vendosur në kufi, pasi kryeministri Benjamin Netanyahu formoi një kabinet lufte dhe thirri qindra mijëra rezervistë të IDF.

Dhe kur bota është duke pritur për lëvizjen e radhës të Izraelit – pse nuk ka ardhur ende?

Lidershipi

Shefat politikë dhe të sigurisë që marrin vendimin për të sulmuar e dinë se mund të shkruajnë “kapitullin e tyre të fundit në jetën publike”, tha eksperti i Lindjes së Mesme, Robert Satloff për rrjetin partner të Sky, NBC.

Shumë mbajnë përgjegjësi për dështimet e sigurisë që çuan në sulmin vdekjeprurës të Hamasit më 7 tetor dhe janë të vetëdijshëm se hetimet do të ndjekin këtë konflikt, tha Howard Berkowitz, i Institutit të Uashingtonit për Studimet e Lindjes së Afërt.

Pengjet

Rreth 220 pengje mbeten të robëruar në Gaza, që besohet të jenë të fshehur në një rrjet tunelesh nëntokësore.

Zyrtarët do të jenë nën presion për të shpëtuar sa më shumë që të munden përpara çdo ofensive, me burime në administratën e Joe Bidenit që thonë se SHBA-ja po mbron vonesat mbi këtë bazë.

Rrezik për trupat izraelite

Ish-oficeri i lartë i inteligjencës britanike Philip Ingram ka thënë për Sky News se IDF do të përballet me disa nga “luftëtarët më të egër të terrorit urban” në botë në Gaza.

Ai shpjegoi se Hamasi do të dijë rrugët nëpër të cilat do të udhëtojë Izraeli, duke përdorur minat, pozicionet më të mira të snajperimit dhe rrjetin e tij të tuneleve për t’i sulmuar ata.

“Ekziston rreziku për të hyrë në një kurth shumë të rrezikshëm”, ka thënë një ish-zyrtar i lartë izraelit i sigurisë për NBC.

Hezbollahu

Milicitë e mbështetura nga Irani, aktive në Siri, Irak, Jemen dhe ndoshta më e rëndësishmja nga të gjitha, në Liban, do të jenë në mendjen e zyrtarëve izraelitë.

Hezbollahu, një grup i fuqishëm militant, ka shkëmbyer zjarr me IDF mbi kufirin libanez që nga 7 tetori dhe ka paralajmëruar Izraelin kundër një ofensive tokësore.

“Askush nuk ka dëshirë për dy fronte në këtë pikë”, tha ish-zyrtari i sigurisë.

Plani i daljes

Benjamin Netanyahu nuk ka vendosur për një plan daljeje se si dhe kur të largohet nga Gaza, tha një zyrtar i lartë qeveritar për NBC.

Dhe nëse Izraeli arrin qëllimet e tij strategjike, askush nuk e di se cilat subjekte mund të zënë vendin e Hamasit. /Telegrafi/