Rizvanolli: Trajnimet në TIK rrisin produktivitetin në industrinë e Kosovës

Ministrja e Ekonomisë, Artane Rizvanolli deklaroi se trajnimi në sektorin e teknologjisë së informacionit (TIK) rritë produktivitetin në të gjithë industrinë e Kosovës.

Këto komente Rizvanolli i bëri në përmbylljen e raundit të gjashtë të trajnimeve semestrale për rreth 300 të rinj nga fushat e “Java Programming”.

“Trajnimi në sektorin e TIK-ut e rrit produktivitetin në të gjithë industrinë e vendit. Njohuritë dixhitale i mundësojnë individëve të thjeshtësojnë proceset dhe të përshpejtojnë procedurat. Kosova sot është kampione në rajon dhe e krahasueshme me shtetet e BE-së dhe të Evropës për shtrirje dhe përdorim të internetit. Gjatë vitit të kaluar kemi arritur të kemi përdorim të madh internetit, duke e vënë Kosovën në top gjashtë vendet në Evropë sa i përket kësaj infrastrukture dhe qasje”, tha Rizvanolli

Shefi i Departamentit të Bashkëpunimit të BE-së në Kosovë, Johannes Stenbaek tha se objektivi kryesor i trajnimit është që të rrisë konkurrencën e bizneseve dixhitale dhe tradicionale të Kosovës.

Stenbaek u shpreh se zhvillimi i sektorit të TIK-ut do të ndikojë edhe në zhvillimin tregut të punës në Kosovë.

“Objektivi i përgjithshëm i projektit është të rrisë konkurrencën e bizneseve digjitale dhe tradicionale të Kosovës duke mbështetur rritjen e sektorit të TIK-ut në Kosovë që çon drejt rritjes dhe krijimit të vendeve të punës. Në total, ata do ta menaxhojnë projektin për 3 vjet e gjysmë dhe do të kenë një buxhet të përgjithshëm prej rreth dy milionë e gjysmë euro”, u shpreh Steanbeak.

Edhe drejtuesi nga ekipi ICT, Grigoris Kontzoglou tha se Kosova ka shumë Kompani të mira të TIK-ut dhe për këtë arsye punojnë me ekspertë në Kosovë.

Kontzoglou shtoi se fokusi kryesor është trajnimi i të rinjve.

“Kosova ka shumë e shumë kompani të mira të TIK-ut. Eksportimi i produkteve dhe shërbimeve të tyre në SHBA, në Bashkimin Evropian në vendet e skandinavisë dhe Zvicrës dhe në vendet e tjera të botës krijon një kërkesë të madhe të ekspertëve të aftë në TIK dhe për këtë arsye ne jemi këtu për të kapërcyer hendekun e aftësive të ekspertëve që ekzistojnë në Kosovë. Fokusi kryesor është trajnimi i njerëzve, trajnimi i të rinjve”, shtoi Kontzoglou.

Mbi 1 mijë e 500 të rinj janë certifikuar gjatë gjashtë semestrave. Projekti “Java Programming” është financuar nga Bashkimi Evropian. /KP/