Rikthim fantastik, Chelsea kandidat serioz për titull në Angli (Video)

Chelsea ka arritur ta shënojë një fitore tejet të madhe në udhëtim te Manchester City.

Skuadra londineze ishte në disavantazh 1-0 në pjesën e parë, mirëpo riktheu gjithçka në të mirë të saj në 45 minutat e fundit duke shënuar tre gola për fitoren 1-3.

Ndeshja filloi me një minute heshtje për tragjedinë që i ndodhi skuadrës braziliane, Chapecoense.

Në pjesën e parë më të mirë ishin vendasit, të cilët rrezikuan disa here portën e mysafirëve.

Raste të mira shënimi kishte sulmuesi Kun Aguero, i cili rrezikoi në minutën e 21 dhe 34, por pa sukses.

Një rast të mirë shënimi e pati edhe mesfushori brazilian, Fernandinho, mirëpo Thibaut Courtois ishte në vend.

Kur skuadrat po bëheshin gati të shkonin në pushim, erdhi edhe goli i parë në ndeshje. Mbrojtësi serb Aleksandar Kolarov harkoi në zone, ndërsa Gary Cahill në tentim për ta larguar topin e dërgoi atë në rrjetë duke kaluar Cityn në epërsi.

Por, trajneri italian i Chelseat, Antonio Conte, u tregua edhe një herë i madh në zëvendësime.

Conte largoi nga loja Pedro Rodriguezin, për ta futur në fushë brazilianin Willian dhe ky zëvendësim doli i qëlluar.

Blutë arritën ta barazonin rezultatin në minutën e 60-të falë një bashkëveprimi mes Cesc Fabregas me Diego Costan ku ky i fundit mposhti portierin Bravo për 1-1.

E barazimi i motivoi më shumë futbollistët mysafirë, të cilët arritën të shënonin edhe një gol tjetër pas 10 minutave.

Një kundërsulm i shpejtë i mysafirëve, bëri që topi të shkonte deri te Diego Costa që asistoi bukur te mesfushori brazilian Willian, i cili shënoi pa ndonjë problem për 1-2.

Deri në fund të ndeshjes, City tentoi të barazonte rezultatin, mirëpo nuk ia arriti të bënte diçka të tillë.

Ndërkohë, në minutën e fundit, mesfushori fantastik belg, Eden Hazard, shënoi për rezultatin përfundimtar 1-3.

Pas kësaj fitoreje, Chelsea mbetet në pozitën e parë në Ligën Premier me 34 pikë të tubuara, katër më shumë se Manchester City dhe Liverpooli (që ka ka një takim më pak të zhvilluar). /Telegrafi/

https://www.youtube.com/watch?v=9CSeObMaki4