Rihanna bëhet zyrtarisht miliardere dhe muzikantja më e pasur në botë

Rihanna tani është zyrtarisht një miliardere dhe muzikantja femër më e pasur në botë, sipas Forbes.

Ylli i popit vlen 1.7 miliardë dollarë (1.4 miliardë euro), me rreth 1.4 miliardë dollarë që vijnë nga vlera e kompanisë së saj kozmetike “Fenty Beauty”.

Pjesa tjetër e pasurisë së saj vjen kryesisht nga kompania e të brendshmeve, “Savage x Fenty”, me vlerë rreth 270 milionë dollarë, dhe fitimet e saj nga muzika dhe aktrimi, shkruan BBC.

Ajo është e dyta pas Oprah Winfrey si artistja më e pasur në botë.

Rihanna – emri i vërtetë i së cilës është Robyn Fenty – themeloi “Fenty Beauty” në vitin 2017 në një partneritet me kompaninë e mallrave luksoze “LVMH”.

Në atë kohë, ajo tha se qëllimi i linjës ishte të bënte thirrje për “çdo lloj gruaje” dhe nisi 40 hije të ndryshme të fondacionit, të cilat në atë kohë ishin kryesisht të pashembullta. Kjo çoi në të ashtuquajturin “Fenty Effect”, ku markat rivale zgjeruan gamën e tyre të hijeve për produktet e kozmetikës.

Linja solli më shumë se 550 milionë dollarë të ardhura vjetore në vitin e saj të parë, tha LVMH.

Sidoqoftë, jo të gjitha ndërmarrjet e biznesit të Rihannës kanë dhënë rezultate.

Në fillim të këtij viti, 33-vjeçarja u pajtua me “LVMH” për të mbyllur markën e saj të modës “Fenty” pas më pak se dy vitesh në prodhim.

Këngëtarja nga Barbadosi ka shitur më shumë se 250 milionë disqe, por nuk ka nxjerrë një album që nga “Anti” i vitit 2016.

Sidoqoftë, ajo kohët e fundit u pa duke xhiruar një video muzikore me të dashurin e saj, reperin A$AP Rocky. /Telegrafi/