Raundi i ri në bisedimet me Iranin

Shefi i Politikës së Jashtme të Bashkimit Evropian, Javier Solana, zhvillon sot bisedime në Londër me kryenegociatorin iranian për energjinë bërthamore, Saeed Jalili. Solana, siç bën të ditur BBC, do të presë të shohë për tregues se iranianët janë të përgatitur të pezullojnë eksperimentet që kanë të bëjnë me pasurimin e uraniumit, sikurse kërkohet nga Këshilli i Sigurimit i OKB-së.

Rezultati i këtij takimi do të ndikojë në vendimin nëse SHBA-ja dhe aleatët evropianë do të kërkojnë, apo jo sanksione të mëtejshme ndaj Iranit. Me gjithë presionin nga Washingtoni dhe aleatët e tij evropianë, Rusia dhe Kina i kanë tërhequr këmbët zvarrë, për sa i takon përpjekjeve për sanksione ekonomike kundër Iranit.

Pesë anëtarët e përhershme të Këshillit të Sigurimit; Rusia, SHBA-ja, Britania e Madhe, Franca dhe Kina pranuan bashkë me Gjermaninë që ta vinin në provë Teheranin. Ato pranuan që të prisnin vendimin e Agjencisë Ndërkombëtare për Energjinë Bërthamore, lidhur me një plan-veprimi të hartuar bashkë me iranianët.

Një raport i dytë pritet nga Shefi i Diplomacisë evropiane, Javier Solana pas takimit të tij me të ngarkuarin e posaçëm iranian. Nëse siç pritet, zoti Jalili nuk tregon asnjë shenjë nga ana e iranianëve për të pezulluar aktivitetet për pasurimin e uraniumit, atëherë kjo do të çojë në ripërtëritjen e nxitjes së sanksioneve të OKB-së.

Kjo do të fillojë gati menjëherë, me një takim të planifikuar të zyrtarëve të ministrive të jashtme të vendeve të përhershme në Këshillin e Sigurimit, takim i cili do të mbahet ditën e shtunë në Paris. /bbc/