Real Madridi ka konfirmuar zyrtarisht se Raul Gonzalez ka dhënë dorëheqjen nga posti i trajnerit të ekipit Castilla, duke i dhënë fund qëndrimit të tij shumëvjeçar në akademinë e klubit.
Raul, një nga legjendat më të mëdha në historinë e Real Madridit, kishte nisur karrierën e tij si trajner në vitin 2018, fillimisht me ekipet Cadete B dhe Juvenil B, përpara se të merrte drejtimin e Castillas.
Në vitin 2020, ai udhëhoqi ekipin Juvenil A drejt titullit të Ligës së të Rinjve, duke konfirmuar aftësitë e tij si trajner dhe përkushtimin ndaj zhvillimit të talenteve të rinj.
Klubi ka shprehur mirënjohje për kontributin e Raulit si lojtar dhe si trajner, duke theksuar se ai mishëron vlerat tradicionale të Real Madridit.
Në të njëjtën kohë, disa media në Spanjë raportojnë se Alvaro Arbeloa, ish-mbrojtës i klubit dhe trajner aktual i Real Madrid U19, është kandidati kryesor për të marrë drejtimin e Castillas.
Megjithatë, emërimi i Arbeloas nuk është konfirmuar ende zyrtarisht nga klubi, dhe pritet që vendimi përfundimtar të merret në ditët në vijim.
Real Madridi i ka uruar Raulit dhe familjes së tij suksese në kapitullin e ri të karrierës dhe jetës së tij, duke lënë të hapur derën për një rikthim të mundshëm në të ardhmen. /Telegrafi/
