Rashiq tregon arsyet se përse nuk pati kandidatë tjerë serbë në zgjedhjet në veri të vendit (Video)

Ish-ministri i Qeverisë së Kosovës, njëherësh kryetari i Partisë Progresiste Demokratike, Nenad Rashiq në një intervistë për emisionin “Përballje” me gazetarin Muhamet Hajrullahu ka folur për zgjedhjet në veri, temën e korrigjimit të kufijve, presionin që kanë liderët serbë të Kosovës nga institucionet në Serbi si dhe çka pritet nga takimi i radhës në Paris.

Ai ka thënë se procesi zgjedhor në katër komunat veriore ka qenë shumë kontraverz që nga momenti i dorëheqjes e deri te vendimi për të shkuar në zgjedhje të reja.

Rashiq ka treguar edhe pse partitë tjera serbe nuk kanë marrë pjesë në këto zgjedhje.

‘’Nuk kishte garë demokratike… ka qenë vetëm nga një kandidat me një parti sepse kemi përvojë shumë të rëndë me kandidatët që nuk kanë qenë nga Lista Serbe edhe kanë përfunduar edhe me vrasje. Prandaj krejt këto rrethana kanë ndikuar që të mos ketë kandidat tjerë nga partitë serbe’ ka treguar Rashiq në intervistë.

Ai ka folur edhe për presionin dhe kërcënimet që kanë ndodhur ndaj të gjithë atyre në Kosovë që nuk janë në një qëndrim zyrtar me partinë e presidentit të Serbisë, Aleksandar Vuçiq dhe me listën serbe.

“Prej vitit 2013, 2014 e 2017 të gjithë në që e kemi një mendim ose qëndrim i cili nuk është i lidhur drejtpërsëdrejti më strukturat në pushtet në Beograd në këtë moment që është partia SNS kemi pasur jo vetëm shantazhe ose kërcënime, anashkalime totale, ambient që është lejuar, këtë mbështetje që e kanë pas lista serbe, e që ka pas një përkrahje të heshtur edhe nga institucionet e Kosovës edhe BE”, ka thënë Rashiq në emisionin “Përballje”.

Emisioni i plotë do të transmetohet në ora 20:30 në RTV Dukagjini e Telegrafi./Telegrafi/