Ndonëse në total në Shqipëri, numërohen 62 institucione të arsimit të lartë publik dhe privat, vetëm 35 prej tyre janë përfshirë në këtë proces, disa për arsye se nuk i ofrojnë katër fushat e studimit ku do të bëhet renditja, nuk kanë numrin e nevojshëm të studentëve që kërkohet, janë institucion i ri ose nuk kanë pranuar të marrin pjesë.
Një ndër to është edhe universiteti më i madh i vendit për nga numri i studentëve, Universiteti i Tiranës. Ashtu sikundër kishin bërë të ditur më parë vetë drejtuesit e tij, se nuk do të merrnin pjesë në proçesin e rankimit pa u bëre më parë akreditimi i universiteteve, Universiteti i Tiranës ka vendosur t’i thotë “Jo” këtij proçesi , megjithëse zotëron katër fushat e studimit për të cilat do të kryhet prcçesi i rankimit, që janë Drejtësi/Juridik; Infermieri/Fizioterapi/Mami; Shkenca Sociale dhe Ekonomi-Biznes.
Agjencia e Akredititmit bën të ditur se ky institucion nuk e ka plotësuar formularin e aplikimit për pjesëmarrjen në proçesin e rankimit që do të zhvillohet për herë të parë në Shqipëri në katër fusha studimi dhe bazohet në dëshirën ë vetë institucioneve për të marrë ose jo pjesë në të, raportoi të mërkurën e përditshmja Mapo.
Ky është një projekt pilot me kohezgjatje Tetor 2010 – Korrik 2011. Agjencia e Akreditimit sqaron se proçesi nuk ka për qëllim krahasimin e institucioneve me njëri tjetrin , por nëpërmjet treguesve sasiorë dhe cilësorë, të japë një pamje reale të institucioneve të arsimit të lartë në Shqipëri. /Telegrafi/
