Ramadani: Kërcënuesit e paqes në Ballkan do të ndëshkohen, Vulin duhet të shkarkohet

Ish-kryeinspektori i Agjencisë së Kosovës për Inteligjencë (AKI), Burim Ramadani thotë se kërcënuesit e paqes në Ballkanin Perëndimor do të ndëshkohen.

Ramadani në profilin e tij në Facebook ka shtuar se kryespiuni i Agjencisë serbe për Siguri dhe Informacion (BIA), Aleksandar Vulin duhet të shkarkohet.

“Rrezikuesit e Ballkanit do të ndëshkohen një nga një! Vulin të shkarkohet! Kur Aleksandar Vulin mori rrugën për në Moskë, u shoqërua nga Millorad Dodik i Bonjë e Hercegovinës dhe nga Ivan Stoilkoviq i Maqedonisë së Veriut. Pra, mesazhi ishte drejt rrezikimit të Ballkanit si rajon. Ivica Daciq, ministri i Jashtëm i Serbisë, ishte po ashtu aty”, shkruan Ramadani.

Sipas tij, Vulin përveç se ka treguar afërsinë e tij me Kremlinin, ky i fundit në mënyrë të vazhdueshme po e rrezikon rajonin.

“Si shef i Shërbimit Inteligjent të Serbisë, Aleksandar Vulin dëshmoi edhe njëherë jo vetëm orientimin pro-rus, por edhe synimin dhe punën e tij të vazhdueshme për të rrezikuar rajonin. Më 25 maj 2023 u mbajt Konferenca e Sigurisë në Moskë, ndërsa më 11 korrik 2023 Vulin u fut në Listën e Zezë të SHBA-së”, thekson ai.

Lexo po ashtu Shërbimi sekret BIA, policia dhe ushtria – institucionet më pak të besueshme në Serbi

“Ai sot edhe më tutje nuk është shkarkuar nga detyra, megjithëse nuk ka zgjidhje tjetër përpos shkarkimit! Porse, mesazhi është i qartë: Rrezikuesit e sigurisë në Ballkan do të ndëshkohen një nga një!”, përfundon Ramadani. /Telegrafi/