Rama: Thaçi do ta nominojë Kurtin pas 48 orëve, më pas do ta kalojë nominimin te LDK-ja

Drejtori i Informacionit në RTV Dukagjini, Fidan Rama ka thënë se Vetëvendosje po jep sinjale se nuk është e interesuar për koalicion me LDK-në.

Rama, në “Debat Plus” me Ermal Pandurin në RTV Dukagjini, ka thënë se zgjedhja e Kryeparlamentarit dhe publikimi i emrave të ministrave është sinjal që tregon se Vetëvendosje nuk është e interesuar për marrëveshje me LDK-në.

Ai ka thënë se zgjedhja e Kryeparlamentarit e ka ndryshuar situatën pasi një pozicion që i ka takuar LDK-së me marrëveshje ka dalë jashtë loje dhe është e pamundur të vazhdohet sikur s’ka ndodhur asgjë, përcjell Telegrafi.

Drejtori i Informacionit në RTV Dukagjini, ka thënë se afati prej 48 orësh që i ka dhënë Presidenti Kurtit është situatë e pa pritur deri më tani.

Ai thotë se gjasat janë që pas këtyre 48 orëve presidenti ta nominoj Kurtin në mënyrë arbitrare si kandidatë për kryeministër.

“Nëse Kurti nuk e merr mandatin, Presidenti mund të shkojë të mandatari i dytë që vjen nga LDK-ja”.

Rama thotë se Kushtetuta e ka një fleksibilitet dhe Presidenti mund të gjejë një arsyetim për të tejkaluar ngërçin e për të mos dërguar vendin në zgjedhje.

“Veprimet e Vetëvendosjes janë sinjale se nuk janë të interesuar të bëjnë koalicion me LDK-në…Unë pashë disa lëvizje jokorrekte të Kurtit ndaj LDK-së”, tha ndër të tjera Fidan Rama./Telegrafi/