Rama përmend prioritetet për ekonominë e Prishtinës: Rivitalizimi i objekteve ikonike, sektori IT-së dhe turizmi malor në fshatra

Kandidati i Lidhjes Demokratike të Kosovës, Përparim Rama gjatë intervistës në “Përballje” në Telegrafi, me kryeredaktorin Muhamet Hajrullahu ka folur për planin, projektet dhe synimet që ai ka nëse zgjidhet si kryetar i kryeqytetit, garë kjo e cilat do të mbahet më 14 nëntor 2021.

Ai në këtë intervistë ka folur për planet e tij në lidhje me zhvillimin ekonomik të kryeqytetit.

Thotë se zhvillimi ekonomik e kryeqytetit do të lidhet me rivitalizimin e objekteve ikonike siç është Pallati i Rinisë por edhe fuqizimin e sektorit të IT-së.

“Kemi sektorin e Teknologjisë Informative. Kemi 500 kompani me 5 mijë inxhinierë të punësuar në mbarë botën. Ne do ta fuqizojmë këtë sektorë përmes hapësirave që do t’iu krijojmë. Por do ta rivitalizojmë edhe Pallatin e Rinisë ku do të ketë hapësira për start-up të rinj”, tha ai në “Përballje” përcjell Telegrafi.

Kandidati i LDK-së për Prishtinën thotë se përmes zonës ekonomike do t’iu mundësohet edhe investitorëve të huaj të vijnë më lehtë në Kosovë, por shton se edhe fshati nuk do të mbetet jashtë vëmendjes.

“Por do të fuqizojmë edhe zonat rurale edhe përmes turizmit malorë. Zona e Gollakut ka një natyrë fantastike. Ka fshatra që janë të fokusuara në sport, çiklizëm, hiking do t’iu mundësojmë rrugët. Ka fshatra tjerë që janë të fiksuar në kultivimin e frutave”, deklaroi ndër të tjera Përparim Rama./Telegrafi/