Rama numëron disa nga sukseset gjatë qeverisjes me Prishtinën, kritikon Qeverinë se po e bllokon projektin për Unazën e Kryeqytetit

Kryetari i komunës së Prishtinës, Përparim Rama, ka mbajtur një konferencë për media, ku ka numëruar disa nga arritjet e tij, gjatë qeverisjes së tij me kryeqytetin.

Rama para mediave tha se kanë bërë investime në shëndetësi, infrastrukturë, kulturë, sport etj, transmeton Telegrafi.

“Kryeqyteti ka lajme të mrekullueshme, kemi thy rekorde këtë vit me realizimin e buxhetit të kryeqytetit. Që nga fillimi i mandatit, kemi pasur rritje të realizmit të buxhetit. Vazhdimi i ndërtimit të rrugës B, ndërtimi i rrugës Bajram Bahtiri, etj. Investime në infrastrukturë dhe blerja e pajisjeve mjekësore në vlerë prej 200 mijë euro. Fillimi i vaksinimit të HPV, zgjerimi i analizave në 4 qendra”, tha ai.

Rama po ashtu tha se kanë bërë nënshkrimin e marrëveshjeve për shërbime mjekësorë falas për policët dhe zjarrfikësit, dhe se po ashtu kanë bërë përmirësimin e gjendjes së mbeturinave.

“Mbyllja e deponimeve ilegale, shpërndarja e kontejnerëve të rinj. Ndriçimi publik i zgjeruar, duke rritur sigurinë qytetarë”, shtoi ai.

Kryetari Rama ka deklaruar se kanë bërë reforma në trafikun urban, ku tashmë kanë bërë kontrata edhe me 24 operatorë privat.

“Vazhdojmë të ngrisim kryeqytetin në nivel ndërkombëtarë”.

Rama theksoi se projekti i Unazës së Kryeqytetit po vazhdon të bllokohet nga Qeveria.

“Gjysma e Kosovës vjen e shkon brenda ditës në Prishtinë, jemi të fokusuar ta bëjmë Prishtinën sa më të mirë. Të kenë fokus kryeqytetin, sepse është motori i Kosovës, dhe është e ardhmja e vendit. Unaza e Kryeqytetit, qeveria po bllokon këtë projekt madhor”, potencoi ai.

Në konferencën për media, ai tha se me metodat e reja për të monitoruar hyrjet dhe daljet, do të ndihmojnë ta rregullojnë problemin në trafik./Telegrafi/