Rama mbështet vendimin e gjykatës: Beleri nuk mund të betohet si kryebashkiak i Himarës, kryetari aktual të largohet nga detyra

Kryeministri i Shqipërisë Edi Rama ka mbështetur sot vendimin e Gjykatës së Posaçme GJKKO për çështjen e kryetarit të zgjedhur të Bashkisë së Himarës Fredi Beleri i cili ndodhet në paraburgim i akuzuar për blerje votash.

Në përmbledhje të vendimit, Rama thotë se vendimi i gjykatës për të ndaluar betimin e Fredi Belerit i cili ndodhet në paraburgim është korrekt.

Në anën tjetër, ai ka shtuar se kryebashkiaku aktual i Himarës Jorgo Goro, i cili doli humbës në zgjedhjet e fundit, duhet të largohet nga detyra.

Lexo po ashtu Seanca për Belerin, SPAK publikon prova: Çfarë u zbulua nga “zbërthimi” i telefonatave

Çështja e Belerit ka krijuar një situatë të tensionuar midis Shqipërisë dhe Greqisë, me këtë fundit që kërcënon me bllokim të procesit të anëtarësimit në BE.

Postimi i Ramës në platformës X:

Nga leximi i vendimit të arsyetuar të GJKKO mbi mosdhënien e lejes për betimin e kryebashkiakut të zgjedhur të Himarës, shoh të udhës të nënvizoj publikisht sa më poshtë:

1. Mosdhënia e lejes për betim në kushtet e paraburgimit nga ana e Drejtorisë së Përgjithshme të Burgjeve, rezulton përfundimisht një qëndrim korrekt ligjor, ashtu sikundër edhe refuzimi i gjykatës speciale ndaj kërkesës është qartësisht i lexueshëm dhe lehtësisht i kuptueshëm.

2. Fakti që kryetari i zgjedhur i Himarës mbetet i tillë deri në fund të gjykimit dhe vetëm shpallja me vendim të formës së prerë do të përcaktojë mundësinë e tij për t’u betuar në rast pafajësie apo pamundësinë e tij për të mbetur kryebashkiak në rast fajësie, është po ashtu qartësisht i lexueshëm dhe lehtësisht i kuptueshëm.

3. Referimi nga ana e GJKKO e ngërçit që krijohet në vazhdimësinë e përkohshme të detyrës nga ana e kandidatit humbës, përderisa faktikisht kryebashkiaku i zgjedhur mbetet në paraburgim, ndërkohë që kryebashkiaku ende në zyrë nuk e ka legjitimitetin për të drejtuar bashkinë në mungesë të fituesit, e bën qartësisht të lexueshme dhe lehtësisht të kuptueshme nevojën e daljes nga ky ngërç përmes ndërprerjes së vazhdimësisë së qëndrimit në detyrë të kandidatit humbës, bazuar në praktikat më të mira europiane për sigurimin e shërbimeve publike në bashkinë e Himarës.

Si përfundim, ky vendim i arsyetuar i GJKKO është një konfirmim i padiskutueshëm ligjor i “çështjes Beleri” si një çështje e drejtësisë, assesi e politikës apo kurrësesi e organeve të qeverisë qendrore. Po ashtu arsyetimi i këtij vendimi krijon një premisë pozitive për adresimin e ngërçit të lartpërmendur.

Nga leximi i vendimit të arsyetuar të GJKKO mbi mosdhënien e lejes për betimin e kryebashkiakut të zgjedhur të Himarës, shoh të udhës të nënvizoj publikisht sa më poshtë:

1. Mosdhënia e lejes për betim në kushtet e paraburgimit nga ana e Drejtorisë së Përgjithshme të Burgjeve,…

— Edi Rama (@ediramaal) December 21, 2023