Kur fillon moti i ftohtë, mbajtja e shtëpisë ngrohtë bëhet përparësi. Edhe ndryshimet më të vogla mund të bëjnë diferencë, prandaj ia vlen të sigurohesh që sistemi yt i ngrohjes po punon siç duhet – duke filluar nga radiatorët.
Sipas inxhinierit të kompanisë Boxt, Will Scholfield, nëse radiatorët nuk po ngrohin mirë ose duken sikur punojnë me “pengesa”, atëherë duhet t’i çlirosh nga ajri i bllokuar (proces që quhet “bleeding”).
Në thelb, kjo do të thotë të lejosh ajrin e mbetur brenda radiatorëve të dalë jashtë. Nëse ajri ngelet brenda, ngrohja nuk shpërndahet siç duhet dhe radiatorët bëhen më pak efikasë.
Foto: Getty
Nëse kjo nuk bëhet për një kohë të gjatë, ajri i bllokuar mund të shkaktojë edhe gërryerje (korrozion) në sistemin e ngrohjes qendrore.
Kjo është një detyrë e thjeshtë që duhet bërë rregullisht, në mënyrë që ngrohja të funksionojë mirë dhe shtëpia të qëndrojë e ngrohtë.
Scholfield shpjegon:
“Nëse i çliron radiatorët nga ajri rreth dy herë në vit, sistemi i ngrohjes do të punojë më me efikasitet dhe do të ndihmosh në uljen e faturave të energjisë.”
Çfarë të duhet për të çliruar radiatorët nga ajri:
Zakonisht, mjetet i ke në shtëpi:
Një çelës për radiatorin ose një kaçavidë, në varësi të llojit të valvulës.
Një leckë ose një enë e vogël për të mbledhur ujin që mund të rrjedhë.
Si ta bësh:
Fike ngrohjen dhe lëre sistemin të ftohet plotësisht;
Vendos një peshqir ose leckë poshtë radiatorit për të mbrojtur dyshemenë;
Gjej valvulën e ajrit – zakonisht ndodhet në krye të radiatorit, në njërën anë. Ajo është e rrumbullakët dhe ka një vrimë për çelësin ose një prerje për kaçavidë;
Fut çelësin në valvul dhe ktheje ngadalë në drejtim të kundërt të akrepave të orës derisa të dalë ajri;
Kur fillon të dalë ujë, ktheje përsëri në drejtim të akrepave të orës për ta mbyllur valvulën;
Përsërite këtë proces për të gjithë radiatorët në shtëpi;
Në fund, kontrollo presionin e ujit në bojlerin e ngrohjes – ai duhet të jetë midis 1 dhe 2 bar. Nëse nuk është, rregulloje sipas nevojës.
