LAJMI I FUNDIT:

Radhë të gjata në Mitrovicë të Veriut për ndihmën prej 130 eurove

Radhë të gjata në Mitrovicë të Veriut për ndihmën prej 130 eurove

Qindra njerëz po presin në radhë para një institucioni financiar në Lagjen e Boshnjakëve, në Mitrovicë të Veriut, ku po bëhet tërheqja e ndihmës financiare prej 130 eurosh.

Kjo shumë parash është pjesë e ndihmës që Qeveria e Kosovës ka ndarë për qytetarët, në kuadër të Pakos Emergjente Fiskale, që ka për qëllim ndihmën e qytetarëve të papunë gjatë pandemisë.

Marrja e kësaj ndihme për qytetarët e Mitrovicës së Veriut, Zveçanit, Leposaviqit dhe Zubin Potokut, bëhet vetëm në zyrat e Ria Transfer, që ka degën në Mitrovicën e Veriut.

Dragan Mitroviq nga Mitrovica e Veriut thotë se është një kaos total, duke shtuar se pagesa ka mundur të bëhej në disa mënyra, që të shmangeshin turmat e tilla gjatë pandemisë së coronavirusit.

“Mund të ketë qenë sipas komunave, dhjetë ditë një komunë, dhjetë ditë një komunë tjetër”, thotë Mitroviq për REL.

Ai thotë se që nga dita e martë, prej orës 07:00 është në pritje që të tërheqë këto mjete. Të martën, më 18 gusht, tregon ai, ishin edhe 30 veta para tij në radhë, kur ky institucion financiar mbeti pa të holla. Të mërkurën, ai thotë se ka ardhur në orët e hershme që ta zë rendin.

“Tani, edhe dhjetë persona janë para meje. Ka shumë njerëz nga Kragujevci, Kraljeva, Beogradi, Çaçaku, Valeva”, thotë Mitroviq.

Borislav Vuçetiq nga Leshaku, të mërkurën erdhi pranë kësaj zyre në orën 04:40.

“Nuk ka distancë, unë mendoj se është një katastrofë”, thotë ai.

Miljana Radojeviq, erdhi për të tërhequr paratë në orën 09:00 të mërkurën, pasi që nga dita e shtunë ka tentuar që t’i tërheqë këto ndihma.

“Unë mendoj se kjo është një katastrofë dhe unë mendoj se zyra e degës para së cilës jemi, e cila është për katër komuna serbe, nuk është në gjendje të kryejë detyrën e saj sepse kjo është thjesht anormale. Policia po e bën punën e tyre mirë, të gjitha lëvdata për ta, tërheqin vërejtjen, por është në ndërgjegjen e qytetarëve nëse do të vendosin maska apo jo. Në radhët e gjata, durimi humbet”, thotë ajo.

Ndërkohë, Ahmet Ismaili, drejtor i Thesarit të Kosovës, bëri të ditur për Radion Evropa e Lirë se pas tollovive të shkaktuara gjatë tërheqjes së parave, kanë vendosur që ta shtyjnë afatin për tërheqjen e ndihmës prej 130 eurove.

Afati paraprak ishte deri më 21 gusht.

“Pas shqetësimit që kemi pranuar, jemi interesuar për çështjen e afatit për tërheqje të mjeteve nga masa 15 (v.j. ndihma prej 130 euro) në zyrat postare, dhe për të shmangur çdo tollovi, sapo kemi zgjatur afatin deri më datën 28 gusht”, tha Ismaili për REL.

Sipas masave që ka ndërmarrë Qeveria e Kosovës, turmat e njerëzve janë të ndaluara gjatë pandemisë, me qëllim që të frenohet përhapja e mëtejmë e coronavirusit.

Faik Hoti, zëdhënës në Ministrinë e Shëndetësisë së Kosovës, tha për REL, se institucionet e Kosovës bëjnë thirrje që grumbullime të tilla njerëzish – siç janë parë në Mitrovicë të Veriut – të mos ndodhin.

“Në çdo komunikatë, në çdo komunikim tërhiqet vërejtje për këtë, që nuk bën të ketë grumbullime, siç janë këto në Mitrovicën e Veriut”, tha Hoti.

Nga Policia e Kosovës në Mitrovicën e Veriut thonë se zyrtarët policorë po e kryejnë punën e tyre dhe pranë këtij institucioni financiarë në çdo kohë po qëndrojnë 20-25 policë. Sipas policisë përgjegjësia bie tek ata që po e bëjnë pagesën e këtyre mjeteve financiare, ku vetëm në një lokacion, qytetarët nga katër komunat veriore po i tërheqin këto mjete.

Sipas masave të ndërmarra nga Qeveria e Kosovës më 28 korrik, të gjithë qytetarët obligohen që të mbajnë maskë dhe distancë fizike prej 2 metrash, kur gjenden në mjedise të përbashkëta jashtë shtëpive të tyre. Ndërkaq, organet e rendit dhe inspektoratet, obligohen që të sigurohen që qytetarët të respektojnë këto masa.

Pagesa prej 130 eurosh filloi t’iu shpërndahej qytetarëve më 12 gusht dhe radhë të tilla u krijuan edhe ditë më parë në këtë komunë në veri të vendit.

Në kuadër të Pakos Emergjente Fiskale, me shumën 130 euro përfitojnë mbi 27 mijë familje. Zbatimi i kësaj pakoje, për muajin prill, maj dhe qershor, u bë pasi më 30 korrik, u miratua rishikimi i buxhetit për vitin 2020.

Të drejtën për përfitimin e vlerës prej 130 euro, nga Pakoja Emergjente Fiskale e kanë familjet të cilat nuk kanë të punësuar asnjë familjar, qoftë në sektorin publik apo privat dhe nuk pranojnë asnjë pagesë mujore nga buxheti i Kosovës.

Në trend Lajme

Më shumë
Dygjuhësia duhet të merret si avantazh, jo problematikë te fëmijët – Pervizaj flet për hulumtimet e fundit

Dygjuhësia duhet të merret si avantazh, jo problematikë te fëmijët – Pervizaj flet për hulumtimet e fundit

Elfije Boletini
Deklaratat për zgjedhje, Konjufca: Mazhoranca nuk ka vullnet që vendi të shkojë në zgjedhje përmes dorëheqjes së Qeverisë

Deklaratat për zgjedhje, Konjufca: Mazhoranca nuk ka vullnet që vendi të shkojë në zgjedhje përmes dorëheqjes së Qeverisë

Lajme
Lajçak me post të ri nga shtatori

Lajçak me post të ri nga shtatori

Lajme
IKShPK: Regjistrohen 8 raste të Kollës së mirë në Kosovë, prindërit t'i vaksinojnë fëmijët

IKShPK: Regjistrohen 8 raste të Kollës së mirë në Kosovë, prindërit t'i vaksinojnë fëmijët

Shëndetësi
RTK: Ambasadori Berishaj po intervistohet nga Prokuroria Speciale

RTK: Ambasadori Berishaj po intervistohet nga Prokuroria Speciale

Drejtësi
Nga 3 prilli gjoba të larta për shkelësit e rregullave në trafik - këto janë ndryshimet me Ligjin e ri

Nga 3 prilli gjoba të larta për shkelësit e rregullave në trafik - këto janë ndryshimet me Ligjin e ri

Lajme
Kalo në kategori