QPS-ja në Shtime nis trajtimin e dy të miturve që ishin përfshirë në rastin e dhunës në shkollë

Rasti i nxënësit “problematik” ( S.S ) në klasën e gjashtë në shkollën Fillore dhe të Mesme të Ulët “Emin Duraku”, paralelja e ndarë në fshatin Davidoc të Shtimes mori vëmendje gjithandej vendit, derisa ai kishte publikuar një video në rrjetet sociale duke e rrahur dhe keqtrajtuar ish shokun e tij të klasës (A.J) dhe ndërkohë duke e hedhur atë në kontejner të mbeturinave.

Shkaku i kësaj në fundjavë edhe prindërit e tjerë të klasës së gjashtë në këtë shkollë patën reaguar duke kërkuar që mos t’i lënë fëmijët e tyre të mbajnë mësim në prezencë të tij.

Ndërkohë edhe Këshilli Komunal për Siguri në Bashkësi në Shtime, ka mbajtur mbledhje të jashtëzakonshme për ta trajtuar rastin.

Rasti tashmë ka nisur të trajtohet nga Qendra për Punë Sociale në Shtime, andaj “dhunuesin” tashmë e kanë dërguar në Prishtinë te psikologët, ndërkohë viktimën po e trajtojnë në QPS në Shtime. Ndërkohë me rastin po merret edhe Policia e Kosovës në Shtime.

Adem Ramadani, ushtrues i detyrës së drejtorit në QPS në Shtime, ka thënë për Telegrafin, se rasti ka marrë përmasa të tjera pas publikimit të videove dhe janë duke e trajtuar me seriozitet.

“Të dy të miturit kanë qenë shokë, por probleme kanë pasur edhe në të kaluarën, derisa u është ndërruar edhe shkolla, por prapë kanë vazhduar problemet mes tyre. Pas rastit të fundit e kemi mbajtur mbledhjen e KKSB-së dhe tash si QPS jemi duke i trajtuar të dytë. Dhunuesin në këtë rast i cili ka publikuar videot në rrjete sociale duke e rrahur shokun e vet, tashmë e kemi dërguar në Prishtinë për trajtim te psikologët, kurse viktimën po e trajtojmë në QPS në Shtime”, ka thënë Ramadani.

Telegrafi ka kontaktuar edhe me prindin e A.J, Muhamet Jakupin, i cili ka kërkuar mbështetje institucionale me arsyetimin se djali i tij përveç lëndimeve trupore ka pësuar edhe çrregullime emocionale.

“Djali po zgjohet disa herë gjatë natës dhe po më thërret Babi më ndihmo, po frikësohem, po më rrahin e të tjera. Ne kërkojmë përgjegjësi dhe mbrojtje institucionale pasi që jemi shumë të shqetësuar me rastin. Ua rikujtoj se ka pasur shumë raste kur ai fëmijë përveçse e kishte rrahur djalin tonë, ia kishte marrë edhe paratë e ushqimit që ne ua kemi dhënë në shkollë. Në disa raste ua kishte marrë nga 5 euro, por djali nuk kishte pasur guxim të tregonte në familje”, është ankuar Jakupi.

Telegrafi ka kontaktuar edhe me ushtruesin e detyrës së drejtorit të shkollës Fillore dhe të Mesme të Ulët “Emin Duraku”, paralelja e ndarë në fshatin Davidoc, Enver Dugolli, por ai nuk ka dhënë detaje nëse do të merren masa ndaj nxënësit S.S.

“Mund të them se rasti është duke u trajtuar nga Qendra për Punë Sociale, ndërkaq mësimi është duke u mbajtur normalisht në shkollë nga nxënësit e tjerë”, ka thënë shkurt Dugolli.

Ndërkohë edhe Këshilli Komunal për Siguri në Bashkësi në Komunën e Shtimes, ka mbajtur mbledhje të jashtëzakonshme e cila kishte në rend dite shqyrtimin e situatës së krijuar pas dhunës së shkaktuar nga S.S. Ndërkohë, pritet të dalin edhe rekomandimet lidhur me rastin./Telegrafi/