Një qendër tregtare në Dubai është përmbytur nga uji – por blerësit të cilët dukeshin të pashqetësuar vazhdonin të kërkonin mallra luksoze.

Sipas mediave të huaja, përcjell Telegrafi, pamjet tregojnë se si uji i shiut po binte nga tavani në një nga daljet që lidh parkun e makinave në Dubai Mall, qendra e dytë më e madhe në botë për blerje, të Dielën.

Madje, siç thuhet tutje, rrjedhja e ujit kishte bllokuar hyrjen në qendër tregtare.

Në një skenë, blerësit shëtisin në katin e përmbytur ndërsa punëtorët e dyqaneve përpiqen të mbrojnë mallin e tyre.

Përmbytja raportohet se është shkaktuar nga një periudhë e reshjeve të mëdha të shiut.

Kompania e zhvillimit të pronave Emaar tha, sipas Dubai Media Office, “Dubai Mall ishte prekur nga reshjet e mëdha të shiut, duke shkaktuar rrjedhje në zona të kufizuara”.

Me një sipërfaqe totale me pakicë prej 5.4 milionë metra katrorë, qendra tregtare ndodhet në zemër të qytetit Dubai dhe ka mbi 1.300 dyqane me pakicë.

Përveç kësaj raportohet se kushtet e paqëndrueshme të motit shkaktuan gjithashtu disa vonesa të fluturimeve dhe nisjeve në Aeroportin e Dubait të hënën pasdite. /Telegrafi/