Pse na mbysin kujtimet e bukura pas ndarjes dhe si ta kuptojmë çfarë vërtet ndjejmë
Nuk janë të gjitha lidhjet të krijuara që të zgjasin. Disa prej tyre ekzistojnë për të na mësuar diçka për veten, për marrëdhëniet, për kufijtë dhe për dashurinë. Por ndarjet rrallëherë kalojnë lehtë. Shumë njerëz më vonë pranojnë se pendohen për vendimin që kanë marrë, ndërsa ekspertët këtë ndjenjë e quajnë “mamurllëku pas ndarjes”, periudha kur na pushtojnë pendimi, nostalgjia dhe rishikimi i gjithçkaje që ka ndodhur.
Megjithatë, pendimi nuk do të thotë se keni gabuar që jeni ndarë dhe as që duhet t’i ktheheni ish-partnerit. Truri i njeriut është i programuar të reagojë me dhimbje ndaj humbjes, edhe kur jemi ne ata që e kemi përfunduar lidhjen. Të ndjerit keq, mallëngjimi dhe trishtimi janë pjesë natyrale e procesit emocional dhe shpesh mund të shndërrohen në nxitës të rritjes personale.
“Shpesh njerëzit ndahen sepse në atë moment i mundon diçka, e pastaj fillojnë të kujtojnë vetëm pjesët e bukura të marrëdhënies dhe ndjejnë trishtim”, shpjegon neuroshkencëtarja Alexandra Stratyner nga Nju Jorku. “Por kjo nuk do të thotë patjetër se duan pikërisht atë person sërish. Ndonjëherë u mungon vetëm ndjenja e afërsisë.”
Prandaj hapi i parë është pauza. Duhet të pyesni veten nga vjen pendimi pas ndarjes dhe çfarë në të vërtetë po ndjeni. Alexandra këshillon që vetëm nëse kuptoni se emocionet janë ende të forta, se mund të lini prapa atë që nuk funksiononte dhe se nuk i tejkaloni kufijtë e personit tjetër, atëherë ka kuptim të mendoni për kontakt.
E më e rëndësishmja është kjo: Para se të tentoni të rindërtoni marrëdhënien, duhet të punoni me veten, me ndjenjat, gabimet dhe nevojat tuaja, transmeton Telegrafi.
Si ta kuptoni nëse me të vërtetë pendohemi pas ndarjes
Përgjigjja më e shkurtër: nga fakti që vazhdimisht mendoni për lidhjen dhe për atë që ka ndodhur.
Qarkullimi i pandërprerë i mendimeve për atë që kemi humbur, është plotësisht natyral. Truri e sheh dhimbjen e ndarjes në mënyrë të ngjashme me fazën e rënies në dashuri: mendojmë obsesivisht, rishikojmë, analizojmë. Nëse ndjeni se historia nuk është mbyllur, është normale të shfaqet pendimi, madje edhe nëse ju keni qenë ai/ajo që e ka ndërprerë lidhjen.
Shërimi i marrëdhënies me veten duhet të ndodhë edhe atëherë kur lidhja nuk vazhdohet.
Si të përballeni me pendimin pas ndarjes
1. Jini sinqerisht kureshtar ndaj vetes
Bëni vetes pyetjet: a ishte vendimi impulsiv, a është jeta juaj tani më e mirë, më e keqe apo e njëjtë, a u ndatë sepse u trajtuat keq apo sepse u frikësuat nga diçka.
Kërkoni mendimin e sinqertë të njerëzve të afërt, sepse ndonjëherë ata i shohin më qartë modelet tona sesa ne.
Nëse mendoni për t’u kthyer te ish-partneri, fillimisht shkruani të gjitha arsyet pse jeni ndarë, e vetëm pastaj mendoni për kontaktimin. Ekspertët sugjerojnë të prisni të paktën dy javë, pasi perspektiva shpesh ndryshon.
2. Bëni inventarin e lidhjes
Pa fajësime, analizoni dinamikën e marrëdhënies. A kishte modele të dëmshme? A i jepnit mbështetje njëri-tjetrit? A i mbronit nevojat tuaja apo i heshtnit ato?
Kujtoni se secili ka 100% përgjegjësi për atë që sjell në marrëdhënie. Kjo është lajm i mirë, sepse do të thotë se mund të ndryshoni atë që nuk ju përshtatet.
3. Mos e ndëshkoni veten
Pendimi është normal, madje edhe kur e dini se ndarja ka qenë vendimi i duhur. Praktikoni pranimin radikal dhe lejoni vetes të ndjeni. Kjo tregon shëndet emocional.
4. Analizoni modelet tuaja
A jeni nga natyra të ankthshëm dhe të prirur për tepër-mendim? Nëse po, ndoshta nuk ju mungon ish-partneri, por dyshoni në aftësinë tuaj për të marrë vendime.
Nëse vini re të njëjtat modele në çdo marrëdhënie, analizoni stilin tuaj të lidhjes, ai shpesh ndikon në mënyrën si lidheni dhe si ndahemi.
5. Shndërroni energjinë e pendimit në zhvillim
Çdo lidhje, edhe ajo që ka dështuar, është një mundësi për të mësuar. Zhvilloni aftësi emocionale dhe komunikimi që çojnë drejt marrëdhënieve më të shëndetshme.
6. Thyejini modelet e vjetra
Shumë automatizma emocionalë vijnë nga konceptet e vjetra për rolet gjinore. Nëse jeni impulsivë dhe prireni të përfundoni shpejt marrëdhëniet, këtë mund ta ndryshoni me durim dhe vetë-reflektim.
7. Kërkoni mbylljen e ciklit
Kur të jeni gati, mund të flisni me ish-partnerin, por vetëm me komunikim të qartë. Shpjegoni pse po kontaktoni dhe çfarë dëshironi, mbylljen e historisë ose ndoshta pajtimin.
Nëse personi tjetër nuk dëshiron, respektoni kufijtë. Kjo do të thotë që dera është mbyllur dhe duhet ta pranoni.
Nëse biseda nuk është e mundur, shkruani një letër që nuk keni pse ta dërgoni. E rëndësishme është të përmblidhni me fjalë çfarë keni mësuar dhe çfarë ju nevojitet për lidhjen e ardhshme. /Telegrafi/
