Prokurori gjerman: Të vrarët përfshinin shtetas të huaj dhe gjermanë

Nëntë persona janë qëlluar për vdekje dhe gjashtë të tjerë janë në gjendje të rëndë, në qytetin gjerman Hanau.

Vrasjet masive që ndodhën në qytetin gjerman Hanau i ka kryer shtetasi gjerman Tobias R. i cili kishte lënë një letër në të cilën shpreh dhe përkrah qëndrimet e tij radikale të së djathtës ekstreme, shkruan e përditshmja gjermane Bild, transmeton Telegrafi.

Viktimat ishin shtetas gjermanë dhe të huaj nga mosha 21 deri në 44 vjeç, tha të enjten prokurori federal i Gjermanisë.

I dyshuari, një burrë gjerman 43 vjeç, kreu sulmet e tij vdekjeprurëse në dy lokale në Hanau, një qytet jo larg Frankfurtit, të mërkurën në mbrëmje.

Pas të shtënave, i dyshuari, u gjet i vdekur në banesën e tij së bashku me nënën e tij, sipas zyrtarëve.

Besohet se i dyshuari vrau nënën e tij dhe më pas veten.

Sulmi vonë të mërkurën ka shokuar të gjithë Gjermaninë, e cila po merret me një kërcënim të rritur të së djathtës ekstreme.

Policia po punon për identifikimin e viktimave.

Është e zakonshme që autoritetet në Gjermani të japin vetëm shkronjën e parë të mbiemrit të dyshuarit. /Telegrafi/