Një shofer kamioni dhe një pilot kanë mbetur relativisht të palënduar pasi një aeroplan bëri një ulje emergjente në një autostradë.

Dhe sipas mediave të huaja, përcjell Telegrafi, policia vlerëson se kostoja e incidentit do të arrijë në dhjetëra mijëra euro.

Siç bëhet e ditur më tej, një pilot përplasi aeroplanin e tij të vogël me një kamion të shtunën, pasi u detyrua të bënte një ulje emergjente në një urë autostrade, konfirmoi policia lokale në një deklaratë.

Mediat shkruajnë se 72-vjeçari kishte fluturuar nga Franca në Holandë, mbi shtetin gjerman të Rheinland-Pfalz, kur motori i tij i vetëm filloi të kishte probleme dhe ai duhej të vendoste shpejt se kur do ta “lëshonte” aeroplanin.

Kështu ai u ul në Schwarzbachtalbrücke – një urë 100 metra e lartë pranë qytetit të Pirmasens në Gjermaninë perëndimore, në kufirin me Francën.

Në urë, aeroplani u përplas me një kamion që po afrohej. Piloti mbeti me lëndime të lehta ndërsa shoferi i kamionit doli i palënduar, tha policia.

Si pasojë, forca të shumta të shërbimit të urgjencës kanë mbërritur menjëherë në vendngjarje ndërkohë që e gjithë rruga duhej të mbyllej plotësisht ndërsa policia pastronte karburantin dhe largoi aeroplanin. /Telegrafi/