Priscilla: Elvisi kishte nisur të abuzonte me tableta gjatë kohës sa ishte në ushtri

Priscilla Presley ka rrëfyer për vartësinë e burrit të saj të ndjerë, Elvis Presley, nga barnat dhe drogat që çoi në vdekjen tragjike të tij.

72-vjeçarja është duke e promovuar dokumentarin e ri, “Elvis Presley: The Searcher”, ndërsa gjatë qëndrimit në Austin të Teksasit ka folur për abuzimin me barna të ‘Mbretit të rokenrollit’ që u pasua edhe me përdorimin e drogave.

“Ishte vështirë për të gjithë ne, sepse nuk e kishim pritur. Mirëpo, ne e kishim parë rrugëtimin e tij. Njerëzit thonë: ‘Pse askush nuk ndërmori asgjë?’. Në fakt, kjo nuk është e vërtetë”.

“Njerëzit e afërt me të kanë bërë shumë, mirëpo nuk mund t’i thoshe Elvis Presleyt se çfarë duhej të bënte. Nuk ke mundur ta bësh këtë. Të nxirrte menjëherë jashtë”, ka rrëfyer ajo.

Lexo po ashtu Të gjitha lajmet për ELVIS PRESLEY

Elvisi ndërroi jetë në gusht të vitit 1977 nga një sulm në zemër dhe sipas Priscillas, vartësia e tij kishte nisur në kohën kur kishte shërbyer dy vjet në ushtrinë amerikane, i stacionuar në Gjermani.

“Ata u jepnin tableta ushtarëve për t’i mbajtur të zgjuar. Kishte manovra të cilat duhej t’i bënte natën vonë, prandaj tabletat iu jepeshin ushtarëve dhe në këtë mënyrë kishte filluar gjithçka”.

“Dhe nëse merr një tabletë për gjumë, atëherë duhet të bësh diçka për ta mbajtur veten zgjuar. Ai ishte në një territor të paeksploruar, vërtet ishte ashtu, ndërsa u përpoq të bënte gjithçka vet”, ka thënë Priscilla.

Sidoqoftë, përkundër problemeve me vartësinë, Presley vazhdoi të bënte muzikë dhe të shndërrohej në njërin prej muzikantëve më të njohur në histori. /Telegrafi/