Prezatohet projekti i Portit Tregtar të Durrësit, Balluku: Lidhet me porte të thata në Kosovë dhe Maqedoninë e Veriut

Zëvendëskryeministrja dhe njëkohësisht Ministrja e Energjisë dhe Infrastrukturës, Belinda Balluku ka folur sot gjatë prezantimi të projektit të Portit të ri Tregtar të Durrësit në Porto Romano nga studio holandeze “Royal Haskoning DHV”.

Balluku ka shtuar se porti është projektuar nga një ndër pesë kompanitë më prestigjioze të botës në fushën e projektimit të porteve, aeroporteve, infrastrukturës tokësore e nëntokësore, energjetike, minerare, industriale, si edhe zhvillimeve urbane e rurale.

Investimi shkon në 390 milionë euro në fazën e parë të projektit dhe pritet të krijojë 1,500 vende pune gjatë ndërtimit të portit që është i ndarë në disa faza me parashikime për përballim të kapaciteteve deri në 2050, tha zëvendësministrja.

Sipas Ballukut, projekti i Portit Tregtar të Durrësit parashikon ndërtimin e porteve të thata në Prishtinë dhe Strugë duke u bërë kështu port rajonal për Kosovën, Maqedoninë e Veriut por edhe më gjerë.

Balluku gjithashtu shoti se projekti do të financohet në masën 46 për qind nga shteti dhe 54 për nga kompania ndërtuese që pritet të zgjidhet në një procedurë tenderi ndërkombëtare që do të hapet në janar të vitit 2023.

Porti i ri i Durrësit është një vepër me rëndësi kombëtare në funksion të tregut të përbashkët rajonal.

Projekti i Portit të ri Tregtar të Durrësit, integron hekurudhën Durrës – Prishtinë dhe portet e thata në Kosovë e Maqedoni të Veriut.

Projekti pritet të nisë zbatimin me çeljen e kantierit të Porto Romanos brenda vitit 2023. /Telegrafi/