Prezantohet legjislacioni për vlerësimin dhe avancimin e mësimdhënësve

Këtë të mërkurë u prezantua pakoja ligjore për Sistemin e licencimit dhe avancimit në karrierë të mësimdhënësve.

Ministrja e Arsimit, Shkencës, Teknologjisë dhe Inovacionit, Arbërie Nagavci, mori pjesë në prezantimin e udhëzimeve administrative dhe Manualit për zbatimin e kësaj pakoje.

MASHTI njofton se kjo pako e legjislacionit përfshinë: UA për sistemin e licensimit dhe karrierën në mësimdhënie.

“UA për Këshillin Shtetëror për licencimin e mësimdhënësve (KSHLM), UA për zhvillimin profesional të mësimdhënësve (ZHPM), UA për kriteret dhe procedurat e aprovimit të programeve për zhvillimin profesional të mësimdhënësve dhe punonjësve arsimorë, UA për vlerësimin e përformancës së mësimdhënësve, Manuali për zbatimin e pakos ligjore për sistemin e licencimit dhe avancimi në karrierë të mësimdhënësve”, thuhet në njoftimin për media.

Sipas ministrisë, një sistem i qëndrueshëm dhe i zbatueshëm i licencimit dhe zhvillimit në karrierë është një nga prioritetet strategjike të Planit Strategjik të Arsimit të Kosovës 2022-2026, në funksion të rritjes dhe përmirësimit të cilësisë në arsim.

Nagavci me këtë rast tha se është duke u jetësuar një reformë të madhe për mësimdhënësit, atë të zhvillimit në karrierë, e cila është çelësi për një cilësi të rritur në shkollat e vendit.

“Kjo pako e legjislacionit sot thërret për përkrahje të vazhdueshme për të gjithë mësimdhënësit në rrugëtimin e tyre në karrierë”, u shpreh ajo.

Ministrja theksoi se është punuar shumë gjatë këtyre dy viteve në mënyrë që të kompletohet jo vetëm infrastruktura ligjore, por gjithë mekanizmat e nevojshëm që garantojnë meritokraci në punë, duke nxitur kështu përmirësimin e performancës dhe llogaridhënies së mësimdhënësve.

“Po ashtu, ministrja ka vlerësuar punën e grupeve punuese dhe të gjithë pjesëmarrësve të tjerë në hartimin e këtyre udhëzimeve, si dhe Bashkimin Evropian që përmes projektit KosEd ka përkrahur me ekspertizë ndërkombëtare dhe vendore këtë proces”, bëhet e ditur nga MASHTI.

Sipas kësaj pakoje ligjore, Nagavci tha se janë paraparë faza e hyrjes në profesionin e mësimdhënies, licenca e karrierës, licenca e avancuar dhe licenca e përhershme e mësimdhënësit.

Dekani i Fakultetit të Edukimit, Blerim Saqipi tha se ka një rënie të interesimit të të rinjve për të studiuar për mësuesi, andaj kjo iniciativë e MAShTI e balancon kontrollin dhe mbështetjen e mësimdhënësve dhe mbështetë zhvillimin e tyre në karrierë. /Telegrafi/