Presidenti i Shqipërisë nuk takohet me Abdixhikun – nuk pajtohen për vendtakimin

Presidenti i Shqipërisë, Bajram Begaj ka takuar liderët e partive opozitare në Kosovë, por jo edhe kryetarin e Lidhjes Demokratike të Kosovës, Lumir Abdixhikun.

Presidenti i Shqipërisë nuk është takuar me Abdixhikut pasi nuk janë pajtuar për vendin ku duhet mbajtur takimi.

LDK në një prononcim për Telegrafin ka thënë se shprehë keqardhje për mosrealizimin e takimit zyrtar me Presidentin e ri të Shqipërisë.

Lexo po ashtu Krasniqi falënderon presidentin Begaj për mbështetjen që Shqipëria po jep për udhëheqësit e UÇK-së

“Për dallim nga krerët institucional paraprak të Shqipërisë, presidentët e shkuar, kryeministrin e tanishëm, e të tjerë kryeministra paraprak, presidenti Begaj ka refuzuar të takojë LDK-në në selinë qendrore të saj.

Ndonëse nuk e kuptojmë refuzimin e tillë dhe shprehim njëkohësisht habinë për një qasje të pazakontë, konsiderojmë si mundësi të humbur takimin me Presidentin Begaj; të cilit i urojmë suksese në përfaqësimin më dinjitoz të Republikës së Shqipërisë.

LDK ka selinë e vet dhe ajo mbetet e hapur për çdo zyrtar të shtetit shqiptar – siç ka qenë përherë”, thonë nga LDK-ja.

Ndryshe, presidenti i Shqipërisë gjatë ditës ka takuar kryetarin e PDK-së, Memli Krasniqin, atë të AAK-së, Ramush Haradinaj, ndërsa gjatë ditës do të takojë edhe përfaqësuesit e minoriteteve. /Telegrafi/