Presidenti i klubit anglez zbulon prapaskenat: E kishim në dorë transferimin e Davies, por nuk i siguruam dot leje pune

Alphonso Davies është njëri nga mbrojtësit e krahut më të mirë në botë.

Ylli i ri kanadez ka shkëlqyer me Bayern Munichun, teksa këtë edicion ka fituar edhe trofeun e Ligës së Kampionëve.

Bayerni e bleu atë dy vite më parë nga skuadra kanadeze Vancouver për një shumë prej 10 milionë euro.

Por karriera e Davies ka mundur të jetë krejtësisht ndryshe, pasi ai ka mundur të përfundojë në Angli te Crystal Palace.

Këtë e ka zbuluar presidenti i klubit londinez, Steve Parish që e kanë pasur në duar transferimin e kanadezit.

“Kur Davies ishte 15-16 vjeç motra ime më rekomandoi ta shikoja. Ne fluturuam në Kanada për ta ndjekur atë”.

“Ne donim të nënshkruanim me lojtarin, por nuk mundëm ti siguronim një leje pune në Angli”, ka deklaruar Parish.

Gjithsesi numri një i skuadrës londineze është i lumtur me sukseset e arritura nga mbrojtësi i majtë.

“Kjo është e vërtetë pasi unë kam ende emailet që kam shkëmbyer me të dhe agjentët e tij. Më vjen keq që nuk arritëm ta transferonim, por jam i lumtur për suksesin e Davies”, ka përfunduar Parish.

19-vjeçari iu bashkua bavarezëve në janar të vitit 2019, ndërsa që nga ajo kohë është bërë njëri nga lojtarët më të rëndësishëm në klub. /Telegrafi/