Premtimet e kandidatit të PDK-së për Podujevën

Kandidati për kryetar të Komunës së Podujevës nga Partia Demokratike e Kosovës. Naim Fetahu, ka shpalosur plan-programin për qeverisje në rast se ai dhe partia e tij dalin të parët në zgjedhjet e së dielës në Podujevë.

Podujeva udhëhiqet nga nënkryetari Nexhmi Rudari që nga shkurti i këtij viti pasi ish-kryetari, Agim Veliu dha dorëheqje për të marrë një post qeveritar.

Në “Debat pernime”,  Fetahu tha se ai ka përgatitur një program zgjedhor i cili jep përgjigje për të gjitha hallet e qytetarëve të Podujevës.

Një rëndësi të veçantë, sipas tij, do të ketë sektori i biznesit.

“Një prej problemeve kryesore të Komunës së Podujevës ka qenë ikja e bizneseve në Prishtinë, Fushë Kosovë, Lipjan e Drenas për shkak të mungesës së mbështetjes nga Komuna e Podujevës. Unë e kam paraparë që në 100 ditëshin e parë të bëjmë studimin e fizibilitetit për të vendosur një zonë industriale te Shtedimi, Mirovci dhe lagjja e Bracalive, në atë pjesë, që të krijojmë kushte për biznesin”, ka premtuar Naim Fetahu, kandidat i PDK-së për kryetar të Podujevës” në “Jeta në Komunë”

Premtime kandidati i PDK-së për të parin e Podujevës dha edhe për bujqit llapjanë.

“Gjithashtu, ne do të krijojmë një mbështetje për bujqësinë, do t’i rrisim mjetet buxhetore dyfish më shumë për bujqësinë, do të rregullojmë infrastrukturën bujqësore për krijimin e tregjeve të reja, do të u japim këshilla atyre”, deklaroi ai./kallxo.com