Policia e Kosovës ka ndërmarrë sot veprime operative dhe hetimore në komunën e Rahovecit, pas publikimit të dy videove në rrjete sociale ku shiheshin persona duke përdorur armë zjarri. Si rezultat, janë sekuestruar disa armë dhe sasi e konsiderueshme municioni, ndërsa ndaj të dyshuarve janë iniciuar procedura penale.
Sipas njoftimit të Stacionit Policor në Rahovec, rastet janë trajtuar veç e veç. Në rastin e parë, një i dyshuar i mitur kishte publikuar video duke shtënë me armë zjarri. Gjatë kontrollit në fshatin Qifllak – Rahovec, policia ka gjetur dhe sekuestruar:
tri armë të gjata,
një pistoletë me një karikator,
një karikator tjetër,
207 fishekë të llojeve të ndryshme dhe
nëntë gëzhoja kalibër 9mm.
Në rastin e dytë, pas publikimit të një tjetër videoje ku shihej një person duke përdorur një pistoletë, policia ka identifikuar një të dyshuar tjetër, mashkull i moshës madhore. Gjatë bastisjes në fshatin Fortesë – Rahovec, janë sekuestruar dy pistoleta dhe një karikator.
Sipas Prokurorisë së Shtetit, e cila ka udhëhequr veprimet policore, për të dy rastet është iniciuar procedurë penale për veprat:
“Mbajtje në pronësi, kontroll ose posedim të paautorizuar të armëve” dhe
“Përdorimi i armës apo mjetit të rrezikshëm”.
Me vendim të prokurorit, i dyshuari i mitur është ndalur në mbajtje për 24 orë, ndërsa i dyshuari i rritur është liruar në procedurë të rregullt.
Policia e Kosovës ka bërë të ditur se do të vazhdojë me veprime të rrepta ndaj rasteve të ngjashme, sidomos atyre që shpërndahen në rrjete sociale dhe nxisin përdorimin apo glorifikimin e armëve të zjarrit.
