Policia: Procesi zgjedhor pa incidente serioze – 6 raste raste penale janë iniciuar

Komisioni Qendror i Zgjedhjeve dhe Policia e Kosovës kanë njoftuar se procesi zgjedhor në Kosovë është zhvilluar në mënyrë të qetë dhe pa incidente serioze, falë realizimit të suksesshëm të planit operacional të sigurisë.

Sipas njoftimit nga Policia e Kosovës, “Plani operacional i paraparë për mbarëvajtjen e procesit zgjedhor, i cili kishte për qëllim ofrimin e sigurisë, mbajtjen e rendit, qetësisë dhe sigurisë publike, u realizua me sukses në tërë territorin e Republikës së Kosovës.”

Në vijim, policia theksoi se “zbatimi i planit policor, bashkëpunimi dhe koordinimi ndërinstitucional ka ndikuar në mënyrë pozitive që i tërë procesi zgjedhor të kalojë i qetë dhe pa ndonjë incident madhor që do të kishte penguar/cenuar procesin zgjedhor.”

Nga ana tjetër, Policia e Kosovës, në bashkëpunim me Prokurorinë e Shtetit, ka inicuar disa raste penale në lidhje me veprimet kundër të drejtës së votimit.

“Policia e Kosovës ka iniciuar 6 raste, prej të cilave 4 janë raste penale nga kapitulli XVIII i KPRK-së ‘Veprat Penale Kundër të Drejtave të Votimit’, dhe 2 raste penale për ‘Sulm ndaj personit zyrtar’ dhe ‘Kanosje’.”

Në lidhje me këto raste, janë shoqëruar 7 persona të dyshuar, ku me autorizim të prokurorit 4 prej tyre janë dërguar në mbajtje, ndërsa 3 janë liruar në procedurë të rregullt”, ka njoftuar policia.

Megjithatë, Policia theksoi se këto raste nuk kanë ndikuar në zhvillimin e procesit zgjedhor.

“Procesi zgjedhor ka kaluar i qetë dhe pa incidente serioze, falë angazhimit të institucioneve të sigurisë dhe qytetarëve,” përfundoi njoftimi, duke theksuar se policia ka trajtuar çdo informacion dhe ka bashkëpunuar ngushtë me prokurorët për çdo rast të dyshuar që lidhej me procesin zgjedhor. /Telegrafi/