Policia në Kapshticë gjen 92 kg kanabis

Policia Kufitare në Shqipëri godet një tjetër rast të trafikut ndërkombëtar të lëndëve narkotike.

Shërbimet e Policisë së Kapshticës, në bashkëpunim me Doganën që mbikëqyr skanerin dhe specialistët e  Seksionit kundër Narkotikëve të DVP- Korçë, sekuestruan 92 kg kanabis në një kamion, ndërsa u arrestuan dhe dy poseduesit e drogës.

Të arrestuarit janë: Artur Yzeiri, 51 vjeç, nga fshati Ravonik dhe Astrit Haxhi, 55 vjeç,  nga Korça.

Policia thotë se “arrestimi i tyre u bë pasi, gjatë kontrollit me qen antidrogë në vijën e dytë në dalje, ku mjeti  tip kamion i markës “Scania” me targa AA630 KO, u përzgjodh për kontroll të detajuar , u krijuan  dyshime  se në pjesën e serbatorit të mjetit, ishte fshehur  lëndë  e dyshuar narkotike”.

Kontrolli më pas, ka vijuar edhe me procesin e skanimit të kryer nga Dogana, ku në një vend të përshtatur, pikërisht  tek pjesa e serbatorit u  evidentuan 18 pako të mbështjella me letër natriban, me peshë 92 Kg lëndë narkotike të dyshuar si “Cannabis Sattiva”, të cilat  u sekuestruan  në cilësinë e provës materiale.

Kamioni drejtohej nga shtetasi  Artur Yzeiri, ndërsa Astrit Haxhi pasagjer.

Materialet  për hetime të mëtejshme, i kaluan Prokurorisë  pranë Gjykatës së Shkallës së Parë, të Krimeve  të Rënda në Tiranë, për veprën penale: “Trafikimi i narkotikëve, kryer në bashkëpunim”. /Telegrafi/